Sápmi |

Anarâšah-searvi ballá govssahallamis duohtavuođa- ja soabadanproseassas – "Anárašovddastus lea sihkkaraston"

Searvvis ballet, ahte anáraččat eai oaččo iežaset komissára duohtavuođa- ja soabadanprosessii. Sámedikki ságadoalli ii oainne váttisvuođa áššis.

Anu Avaskari ja Tiina Sanila-Aikio
Anarâšah-searvvi ságajođiheaddji Anu Avaskari ja Sámedikki ságajođiheaddji Tiina Sanila-Aikio eaba leat ovttaoaivilis anáraččaid ovddastusas komišuvnnas. Govva: Berislav Jurišić / Yle, Vesa Toppari / Yle

Anarâšah-searvvi mielas sámiid duohtavuođa- ja soabadanproseassa ii sáhte bidjat johtui dál árvaluvvon vugiin. Searvi dieđihii áššis sotnabeaivve. Áššis lea ságastallon searvvi jahkečoahkkimis juovlamánu álggus.

Suoma stáhta ja sápmelaččaid gaskasaš duohtavuođa- ja soabadanproseassa mandáhtta almmustahttui mannan vahkus. Evttohusas árvalit, ahte duohtavuođa- ja soabadankomišuvnnas livčče vihtta komissára, geain guokte válljejuvvojit stáhtaráđi evttohusas, guokte Sámedikki evttohusas ja okta Nuortalaččaid giličoahkkima evttohusas. Komišuvnna nammadeamis galget váldit vuhtii dássebealagit buot sámi giellajoavkkuid.

Anarâšah-searvi goit cealká, ahte dat ii luohte Sámediggái dán áššis. Searvvis ballet, ahte sii govssahallet duohtavuođa- ja soabadanproseassas, jus eai oaččo iežaset komissára, muitala searvvi ságajođiheaddji, maiddái Sámedikki áirras Anu Avaskari.

– Ollisvuohtan lea buorre ášši, ahte bargu vuolgá johtui ja ášši ovdána, muhto mii galgat oažžut ovttaveardásaš oassálastinvejolašvuođa nugo eará sápmelašjoavkkuin lea. Mii galggašeimmet beassat seammaláhkai go earátge oassálastit komissára válljemii.

– Sámediggi ja Nuortalaččaid giličoahkkin besset dán áššis mearridit, ja dieđus lea, ahte Sámedikki bokte anáraččat eai oaččo iežaset komissára dego gulašii.

Anu Avaskari, Inarin kunnanvaltuuston pj. ja Saamelaiskäräjien jäsen
Anarâšah-searvvi ságajođiheaddji Anu Avaskari mielas lea boastut, ahte nuortalaččat besset válljet iežaset komissára komišuvdnii. Govva: Berislav Jurišić / Yle

Anarâšah-searvvi ságajođiheaddji mielas lea heittot, ahte nuortalaččat besset válljet iežaset komissára.

– Dat ii sáhte leat nu, ahte nuortalaččain lea dás erenomáš sajádat, go veardida anáraččaide. Vuolggasadjin dat lea heittot.

Searvi áigu lágidit áššis rabas ságastallandilálašvuođa boahtte jagi álggus.

– Mii váldit maiddái stáhtaráđđái oktavuođa dán áššis, Anu Avaskari muitala.

Anarâšah-searvvi jođiheaba dás ovddosguvlui ságadoalli Anu Avaskari ja várreságadoalli Aarne Turunen. Ođđa stivrii gullet maiddái Inka Kangasniemi, Kaisu Nikula, Ritva Hirvelä, Jarmo Katajamaa ja Antero Svendsen. Várrelahtut leat Aune Kuuva, Anni Salonen ja Pertti Sarre. Searvvi čállin joatká Ida Katajamaa.

Stáhtaráđđi lea ožžon reivve

Stáhtaráđis muitalit vuossárgga, ahte sii leat ožžon Anarâšah-searvvi jahkečoahkkindieđáhusa áššis.

Vuoigatvuođaministeriija ráđđádalli virgeolmmoš Johanna Hautakorpi muitala, ahte sii eai leat vel geargan oahpásmuvvat dasa. Ášši válmmaštalli virgeolbmot gieđahallet dan maŋŋá.

Sámedikki ságajođiheaddji: Áššis ii leat váigatvuohta

Sámedikki ságajođiheaddji Tiina Sanila-Aikio deattuha, ahte buot sámi giellajoavkkut váldojuvvojit vuhtii, go duohtavuođa- ja soabadallanprosessii válljejit komissáraid. Dat lea čállon maiddái proseassaevttohussii, mandáhttii.

Sanila-Aikio geardduha, ahte anáraččaid ovddastus lea sihkkaraston juo proseassa válmmaštallanbarggus.

Saamelaiskäräjien puheenjohtaja Tiina Sanila-Aikio
Sámedikki ságajođiheaddji Tiina Sanila-Aikio deattuha, ahte buot sámi giellajoavkkuin lea ulbmil leat ovddastus komišuvnnas. Govva: Vesa Toppari / Yle

– Mu mielas dán áššis ii leat váigatvuohta, dat lea váldon vuhtii válmmaštallanbarggus. Nu ahte mun in dieđe, mii dán ášši duohkin lea, buot giellajoavkkut galget leat mielde.

Mandáhtta dohkkehuvvo Sámedikki ja nuortalaččaid čoahkkimis

Čuovvovaš lávki Suoma stáhta ja sápmelaččaid gaskasaš duohtavuođa- ja soabadanproseassas lea, ahte Sámediggi ja Nuortalaččaid giličoahkkin dohkkehit árvaluvvon mandáhta.

Áššis mearriduvvo Nuortalaččaid giličoahkkimis duorastaga 12.12. ja Sámedikki ollesčoahkkimis maŋŋebárgga ja gaskavahku 17.–18.12.

Jos dát guokte čoahkkima dohkkehit proseassaaevttohusa, álggahit dan maŋŋá komišuvnna nammadanproseassa.

Loga Yle Sámi artihkkala duohtavuođa- ja soabadanproseassa váldočuoggáin dáppe.

Varrasamosat: Sápmi

Váldoođđasat

Varrasamosat

Muualla Yle.fi:ssä