Säämi |

Anarâšâi kirkkopase uárnejuvvoo pasepeeivi: taan ive fáddán láá anarâškielâlâš evaŋgeliumeh

Anarâšâi kirkkopase álgá pasepeeivi tijme 11 Aanaar kirhoost. Immeelpalvâlus maŋa lii káhvástâllâm já anarâškielâlij evaŋgeliumij almostittemtilálâšvuotâ.

Taan ive anarâšâi kirkkopase fáddán láá anarâškielâlâš evaŋgeliumeh. Ovdebái iivij fáddán lii lamaš ovdâmerkkân evakkoäigi já evakkomätki. Govva: Aletta Lakkala / Yle Sápmi

Taan oho pasepeeivi Aanaar kirhoost piäsá kuullâđ Immeelpalvâlus anarâš- já suomâkielân, anarâšâi kirkkopaaseest.

Jyehi ive kirkkopaaseest lii teemâ teikkâ fáddá. Taan ive fáddán láá anarâškielâliih evaŋgeliumeh.

– Kirhoost immeelpalvâlus maŋa lii tot anarâškielâlij evaŋgeliumij almosttittemtilálâšvuotâ. Tothân lii hirmâd pyeri já suotâs äšši, et mist láá tääl toh evaŋgeliumeh anarâškielân jurgâlum já tot jurgâlempargo juátkoo täst ovdâskulij, muštâl Aanaar servikode kirkkohiärrá Tuomo Huusko.

Anarâšah-servi já Aanaar servikodde láá taan räi ornim kirkkopase, mutâ taan ive fáárust lii meid anarâškielâ servi.

– Taan ive tiäđust-uv lii tot, et kielâteema lii meid fáárust. Mist láá evaŋgeliumeh almostuumin já servi lii kielâ servi já tom peeleest tot oro lemin aaibâs hiäivulâš, muštâl anarâškielâ seervi saavâjođetteijee Marja-Liisa Olthuis.

Anarâškielâ seervist iä lah val savâstâllâm tast, puávtáččij-uv servi leđe fáárust orniimin anarâšâi kirkkopase meid puátteevuođâst.

– Muu persoovnlâš uáinu lii tot, et puoh mii ovdeed anarâškielâ já kulttuur, te tot lii pyeri. Mutâ ep lah seervist sárnum tast vala almolávt, iätá Olthuis.

Anu Avaskari anarâšah seervist osko, et kirkkopaseest kiäsut tot, et puáhtá leđe oovtâst ulmuigijn já siärvástâllâđ

– Lam eromâš ilolâš, et meid elilâm ulmuuh láá ain lamaš pääihi alne. Já veikkâ lii ain tot fáddá, te puáhtá savâstâllâđ eres-uv aašijn já tot lii meid taggaar suhâpuolvâi teivâm tilálâšvuotâ.

50 olmožid peesih kiirkon: almottâttâm kirkkohiärávirgetoimâttâhân

Anarâšâi kirkkopase uárnejuvvoo taan oho pasepeeivi já tábáhtus álgá tijme 11 Aanaar kirhoost. Koronatile kuittâg ain vaaigut tábáhtus orniimân.

– Tääl mist lii taggaar eromâš tile, et kirkkopasepiäiván kolgâččij almottiđ kirkkohiärávirgetoimâttâhân já nuuvt, et 50 olmožid peeesiih toho kiirkon, muštâl Tuomo Huusko.

– Ulmuuh láá kenski lamaš váhá várugâsah ko lii tággáár raijiittâs. Ulmuuh iä kenski tondiet lah almottâttâm ko láá jurdâččâm, et ij lah saje, arvâl Anu Avaskari.

Taan-uv ive sáttu vuálgá Avelist tijme 10 Avveel kirho šiljoost. Huusko muštoot, et meid sáátun kolgâččij almottiđ muuneeld kirkkohiärávirgetoimâttâhân.

Tovle Anarist lâi viärrun čokkâniđ kirhostâllâđ jonsahpeei ääigi já syeinimáánu aalgâst. Anarâšâi kirkkopase kunnijât taam viäru.

Kuldâl lase anarâš saavâid tääbbin.

Varrasamosat: Säämi

Váldoođđasat

Varrasamosat

Muualla Yle.fi:ssä