Säämi |

Anarâškielâ leevvân meid Youtuben – “Maht ulmuid puávtáččij vala aktivistiđ?”

Keesi ääigi Youtuben lii almostum love uánihis anarâškielâlâš fiilmâ. Videoin puáhtá uáiniđ táválijd argâpeeivi puđâldâsâid, pargoeellim tâi luándust jotteem.

Jietna: Martta Alajärvi pennuinis tube-videost
Jietna
Anarâškielâ seervi Youtube-kanavast puáhtá uáiniđ ovdâmerkkân Maarta já Kumpus fiäránijd. Kuldâl Maarta sahhiittâllâm Yle Areenast. Jietna: Yle Areena. Kove: Martta Alajärvi Youtube-filmâ

Youtube-videoh láá taan peeivi uáli pivnoheh já tanen meid Anarâškielâ seervi tubetškuođij ađai rähtiđ Youtube-fiilmâid. Servi almostitij keesi aalgâst jieijâs Youtube-kanava, kuus lii puáttâm uđđâ video suullân jyehi oho. Filmâpitái fáádáh láá maaŋgâmuđusiih. Ohtâ filmâ viärdádâl kuálástem Säämist já Keniast, ko vuod nube fiilmâst kovvejeijee hárjuttâl timelapse-kuvvim.

Tubettem-haavâ uárnejeijee Martta Alajärvi iätá, et proojeekt lâi aaibâs šiev iskâm já videoh lijjii suottâseh. Ulmen lâi, et aainâs-uv love videod almostuuččij, te ton peeleest haahâ olášui, mut čuolmâingin ij puáhtâm velttiđ.

– Jiem tieđe lii-uv keesi taggaar äigi vâi mondiet, mut motomin ulmuuh vájáldittii, et sist lâi tot okko, kiäh lijjii váldám tom oho. Motomin mun meiddei vájáldittim, et mun jiem muštám muštottiđ ulmuid, sun muštâl.

Juurdân lii, et tubettem juátkoo meid puátteevuođâst

Alajärvi iävtut, et tubettem ij taarbâš joskâđ veikkâ keesi lii nuuhâm, ko kanava-uv toos jo lii. Videoid ij kuittâg tarbâšičij almostittiđ jyehi ohhoost, tego moonnâm keesi tohhii.

– Ličij pyeri váhá tego ovdediđ tom jurduu já smiettâđ, ete maht puávtáččij vala aktivistiđ taid ulmuid, Alajärvi hundâruš.

Anarâškielâ seervi Youtube-kanava
Anarâškielâ seervi Youtube-kanavast kávnoo videopitáh maaŋgâmuđusijn puđâldâsâin. Govva: Anarâškielâ seervi Youtube-kanava

Keesi videopittáin ij lamaš räijejum fáddá já juáháš uážui jieš valjiđ, maggaar video ráhtá. Alajärvi arvâl, et ulmuin ličij älkkeb rähtiškyettiđ, jis fáddá lii adelum muuneeld.

– Siämmáánáál, jis škoovlâst kalga veikkâ maainâs čäälliđ já ij lah mihheen fáádáid já tuše máttáátteijee iätá, et räähti mastnii, te tot lii váhá vaigâd. Jis ličij veik listo, mast liččii toh fáádáh já talle uážžu valjiđ, mon fáádá haalijd.

Alajärvi lijkkoo meid juurdân, et liččii veikkâ muádi oho kukkosiih pajeh, moi ääigi kalga rähtiđ fiilmâ muuneeld adelum fáádá pirrâ.

– Talle puáđáččij tuáivui mield ennuv videoh siämmáá fáádást.

Varrasamosat: Säämi

Váldoođđasat

Varrasamosat

Muualla Yle.fi:ssä