Säämi |

Anarâškielâseervi ihečuákkim sirduu ohhoin koronavirus tiet já ihečuákkim uárnejuvvoo káidusin – “Tuáivuimield ulmuuh puátih”

Anarâškielâ seervi ihečuákkim uárnejuvvoo 29.3.2020.

Marja Liisa Olthuis
Seervi saavâjođetteijee Marja-Liisa Olthuis osko, ete čuákkim luhostuvá pyereest meid káidusohtâvuođâi peht. Govva: Yle / Anja Kaarret

Koronavirus lii vaiguttâm meid Anarâškielâ seervi toimáid. Seervist koolgâi leđe ihečuákkim taan oholoopâ ääigi, mutâ tääl ihečuákkim lii sirdum ohhoin. Taat lii historjálâš ihečuákkim, tast ko seervist ij lah ovdil lamaš ihečuákkim káidusin. Seervi saavâjođetteijee Marja-Liisa Olthuis kuittâg osko, ete čuákkim luhostuvá pyereest meid káidusohtâvuođâi peht.

– Jiem mun tieđe mondiet ij luhostuččii. Misthân lii hárjánem toos virtuaallávt čuákkimistmân, ij tot tađe komálub kolgâččii leđe kiässán, sun muštâl.

Ravvuuh káidusčuákkimân láá puátimin Anarâškielâ orroomviistán, Inarilainen-loostân já Anarâškielâ seervi Facebook-sijđoid.

– Juurdân lii, et tohon puáhtá almottittiđ já talle finnee liiŋkâ. Mun piejâm tom liiŋkâ tiäđust-uv uáinusân talle, te kannat čuávvuđ orroomviste. Jis kiinii ij lah orroomvisteest, te lii tehálâš almottittiđ, ete kávná talle rievtis sajan. Pyehtip vuolgâttiđ šleđgâpoostân tom liiŋkâ, sun muštâl.

Jis ij lah Facebookist, te lii eromâš tehálâš almottittiđ čuákkimân jo vástuppeeivi.

– Mist lii pasepeeivi čuákkim, te tiäđust-uv vástuppiäiván lii pyeri almottittiđ, eromâšávt talle jis ij lah orroomvisteest ige taggaar saajeest, ete kávná taid liiŋkâid jieš, sun muštâl.

Taan tove ulmui ij taarbâš mađhâšiđ Anarân čuákkim tiet. Seervi saavâjođetteijee tuáivu, ete ulmuuh uásálisteh meid káidusčuákkimân.

– Na tuáivuimield ulmuuh puátih, saavâjođetteijee tuáivu.

Anarâškielâ seervi ihečuákkim lii 29.3.2020 tijme 17:00.

Varrasamosat: Säämi

Váldoođđasat

Varrasamosat

Muualla Yle.fi:ssä