Sápmi |

Anárii ceaggánit ođđa hoteallat – Leago gilli gearggus stuorra turistameriide?

Turisttaid lassáneapmi lea addán roahkkatvuođa investeret turismaealáhussii maiddái Anáris. Jouko ja Mari Lappalainen ođđa, 200 báikki hotealla-restoraŋŋá gárvvásnuvvá juovlaturismii.

Jouko ja Mari Lappalainen
Mari ja Jouko Lappalainen hukseba ođđa hotealla Anárii. Govva: Xia Torikka / Yle Sápmi

Turismaealáhus stuorru Davvi-Suomas jagis jahkái. Mannan dálvve turisttaid mearri lassánii davvin badjel 15 proseantta.

Maiddái Anáris leat joreštišgoahtán turisttat birra jagi. Dálvet Anáris johtet turisttat eanaš Hong Kongas, Taiwanas ja Jáhpanis. Giđabealde fas guovllus johtigohtet eurohpalaččat.

Turisttaid lassáneapmi lea addán roahkkatvuođa investeret turismaealáhussii. Anárjávrri gáddái ceaggána dán jagi bealde ođđa hotealla, gili guovtti boares hotealla ja eará idjadansajiid lassin. Maiddái nuppi hotealla leat plánemin Juvdujoga gáddái, muhto dan huksenbarggut álget vejolaččat easkka boahtte álgogeasis.

"Lunddolaš viiddidit Anárii"

Jouko ja Mari Lappalainen leaba huksemin hotealla Anárjávrri gáddái, Anára gilis moadde kilomehtera máttás.

Bárra oamasta ovddežis Nellima meahccehotealla. Sudnuide lei lunddolaš viiddidit doaimma Anárii.

– Moai áigá jo mearrideimme, ahte háliidetne hukset deike Anárjávrri gáddái. Munno mielas geasseturisma lea nana vuođu alde ja sáhttá nanosmuvvat ain eanet. Dát lei munno mielas lunddolaš ovdáneapmi, lohká Jouko Lappalainen.

Inari Wilderness hotel
Ođđa hotealla gárvvásnuvvá juovlamánus. Govva: Xia Torikka / Yle Sápmi

Jouko ja Mari Lappalainen leaba duđavaččat hotealla báikái Anárjávrri gáttis.

– Dát lei munno mielas čáppa báiki. Moai letne vehá dáppe doaresbealde, go dás beassá buorebut turismma prográmmafálaldagaide, čilge Jouko Lappalainen.

Ođđa Wilderness Hotel Inari -hotellii ohcet dál hotealla- ja restoraŋŋábargiid.

– Mii leat rekryteremin. Mii dárbbašat oalle olu bargiid, Mari Lappalainen joatká.

Leago Anára gilli gárvvis stuora turistameriide?

Visit Inari doaimmajođiheaddji Tapani Lappalainen oamasta Anáris Hotel Inari, Visit Inari Safaris ja luopmohyttaid. Son lea bargan turismasurggiin juo badjel 30 jagi.

Lappalainen oaivvilda, ahte Anár ii dárbbašivčče lasi hoteallaid juste dál, go gilis eai gávdno doarvái eará bálvalusat.

– Mun oainnán, ahte turismma lassáneapmi galggašii leat dássit ja bures hálddus vai maiddái bálvandássi bissu ortnegis. Hástalusaidhan dat ásaha, dál juste orru nu issoras dat lassáneapmi. Dat hástá min buohkaid, ahte mii bargat bures min barggu ja bálvalusat bissot ortnegis, smiehtada Tapani Lappalainen.

Tapani Lappalainen
Tapani Lappalainen lea bargan turisttaiguin 30 jagi. Govva: Vesa Toppari / Yle Sápmi

Anára márkanis ii leat earágo dušše okta borramušgávpi. Dasa lassin turisttaide ii leat vuos fállun nu olu prográmma. Earret eará dan dihte turisttat leat vádjolan maiddái priváhta olbmuid šiljuin, muitala Lappalainen.

– Buot bálvalusat, maid turisttat dárbbašit galget leat ortnegis amaset sii beahttašuvvat. Das eai galggaše boahtit báikkálaččaid geahččanguovllus hehttehusat. Dat galggašii leat dárkilit smihttojuvvon, gos ja mo turisttat johtet ja nu ain, Lappalainen oaivvilda.

Hotelli Inari
Tapani Lappalainen osttii Hotel Inari diibmá. Govva: Vesa Toppari / Yle

Ođđa hoteallaeaiggátguovttos eaba fuolas turistamearis

Jouko ja Mari Lappalainen ođđa hotealla-restoraŋŋá fállá saji oktiibuot 200 olbmui. Hotealla galggašii gárvvásnuvvat juovlamánus.

Bárra ii leat fuolas stuorra turistameriin. Soai jáhkkiba, ahte mađi eanet leat turisttat, dađi eanet boahtá leahkit maiddái fálaldat.

– Gal mun sávan ja jáhkán, ahte Anáriige boađašii nubbi gávpi, go bohtet eanet olbmotge, lohká Mari Lappalainen.

Soai eaba fála dušše idjadeami, muhto baicce maiddái iežaset aktivitehtaid turisttaide.

– Mii fállat guovssahasreaissuid, muohtagápmagiiguin vázzima, guolástanreaissuid ja nu ain, Mari Lappalainen čilge.

Varrasamosat: Sápmi

Váldoođđasat

Varrasamosat

Muualla Yle.fi:ssä