Sápmi |

Anárii mieđihedje historjjálaš olu ealgalobiid, muhto badjel duhát ealgga báhce bážekeahttá  

Guokte jagi dassái duođaštedje helikopterlohkamiin, ahte Anáris leat duháhat ealggat. Soađegilis báhče measta visot lohpeealggaid.

Ealggat. Govvejuvvon helikopteris.
Vaikko Anáris leat valjis ealggat, de daid eai nagodan bivdit nu olu go ledje lobit. Duhát ealgga báhce bážekeahttá. Govva: Petri Timonen / LUKE

Máŋggat bivdoalbmát gárte dán ealgabivdobajis máhccat guoros gieđain bivddus ruoktot.

Anárii ledje mieđihan historjjálaš olu lobiid, 1749 lobi. Bivdu nogai ikte gaskavahku, muhto dán logus báhče dušše 700 ealgga.

Anára fuođđogáhttensearvvi ságadoalli Pertti Vikeväkorva ii máhte addit dárkilis siva dasa, manin nu olu ealggat báhce bážekeahttá.

– Ammal ealggat eai leange nu olu, maid gádde. Eanemus lobit báhce geavatkeahttá Leammi ja Muotkeduoddara guovlluin, dadjá Vikeväkorva.

Geassit go lobiid mieđihedje, bivdit oaivvildedje jo dalle, ahte buot lohpeealggaid eai nákce báhčit. Ovddit jagi Anáris baste geavahit dušše 41 proseantta ealgalobiin. Jahkái 2018 Anárii mieđihedje badjelaš 1400 ealgalobi.

Olles Lappii mieđihedje badjel 10 000 ealgalobi, dain geavahedje badjel 70 proseantta.

Gassa muohta váttásmahttá ealggaid eallima

Soađegillái ledje mieđihan 505 ealgalobi. Doppe baste geavahit measta visot lobiid, muitala Soađegili fuođđogáhttensearvvi ságadoalli Viljo Pesonen.

– Soađegilis geavahedje 90 proseantta lobiin. Dat lea buorre lohku, go smiehttá man váttis lei bivdit čakčat, go muhtii nu árrat, muitala Pesonen.

Aiddo dál leat Soađegilis lohkamin ealggaid helikopteriin. Luondduriggodatguovddáš Luke girdá Soađegili guovllus máŋga vahku.

Dutki Petri Timonen luondduriggodatguovddážis muitala, ahte dán dálvvi ealggat johtet čoran. Gassa muohttaga dihte ealggain lea álkit johtit seamma ruvggáldagaid mielde. Sii leat oaidnán helikopteris juobe 13 ealgga čorraga.

Ealggat. Govvejuvvon helikopteris.
Dát govva lea govvejuvvon jagis 2018 Áŋŋela guovllus ealggaid lohkama oktavuođas. Govva: Petri Timonen / LUKE

Timonen lea fuolas das, mo čearpmahat birgejit dákkár muohtadálvvi áigge.

– Čearpmahat dárbbašit dál áldduid, go eai ieža dáidde ollit doadjit ovssiid dahje muorragierragiid biebmun, čilge Timonen.

Luke plánain lea girdit gitta Vuohču ja Ráji-Jovsseha ráje lohkamin ealggaid. Dohko helikopter olle sullii beannot vahku geažes.

Anáris eai loga ealggaid dán jagi helikopteriin, go dan dahke guokte jagi dassái. Dalle duođaštedje, ahte Anáris leat duháhat ealggat.

Varrasamosat: Sápmi

Váldoođđasat

Varrasamosat

Muualla Yle.fi:ssä