Sápmi |

Anáris dollojuvvo Sámi árrabajásgeassima ávvuseminára – "Árabajásgeassima dilli lea buorráneamen"

Seminára lea álgán Sámekulturguovddáš Sajosis odne bearjadaga ja dat joatkašuvvá ihttin lávvardaga.

Kari Torikka
Lappi guovlohálddahusdoaimmahaga oahpahusdoaimma bajitdárkkisteaddji Kari Torikka. Govva: Gabriela Satokangas / Yle

Anáris lea álgán odne bearjadaga 7.6. guovttebeaivásaš Sámi árrabajásgeassima ávvuseminára. Seminára lea oassin álgoálbmot gielaid temájagi ja doppe ovdanbuktojuvvo áigeguovdilis dutkandiehtu sámi árrabajásgeassimis. Sáhka galgá leat maiddái das, ahte mo unnamánáid giela gárggiideami sáhttá doarjut. Prográmmas lea maiddái sápmelaš mánáidgárdeoahpaheaddjiskuvlejumi giđđafeasta.

Lappi guovlohálddahusdoaimmahaga oahpahusdoaimma bajitdárkkisteaddji Kari Torikka muitala, ahte sámi árabajásgeassima dálá dilli lea oalle váttis.

– Láhka geatnegahttá gielddaid ordnet sámegielat beaivedivššu seamma láhkái go suomagielat ja ruoŧagielatge. Muhto dilli dieđusge lea oalle váttis, go mis leat váilon gelbbolaš oahpaheaddjit. Ja jos dat gávdnojitge, de doppe leat ain stuorra hástalusat, ahte gos oažžu sadjásaččaid jos muhtin bargi gártá eret vaikko buohccivuođa dihte.

Torikka dadjá, ahte muhtin gielddain leat stuorra hástalusat, go beaiveruovttut eai leat ortnegis.

– Ovdamearkka dihte Anáris leat gártan gáidosii čáhcevahát- ja sisáibmováttisvuođaid dihte. Muhto lihkus ovdamearkka dihte Eanodaga gielddas lea buoret dilli, doppe lea ođđa beaiveruoktu gos sámemánátge bastet orrut.

Kari Torikka jáhkká, ahte sámi árabajásgeassima dilli lea buorráneamen goit sámeguovllus. Okta sivva lea, ahte Sámi oahpahusguovddáža, Oulu universitehta ja Sámedikki mánáidgárdeoahpaheaddjiskuvlejumis oažžut gelbbolaš oahpaheaddjiid. Dat ii goittotge leat Torikka mielas doarvái.

– Mu mielas riikkadásis fertešii oažžut ruhtadeami, ja maiddai Oulu universitehta mii lea dat lagamuš universitehta mii lágida mánáidgárdeoahpaheaddjiskuvlejumi, válddášii vuot ođđa spáppa gihtii ja vuolggášii ovddidit dan skuvlejumi.

– Dieđusge go manná sámeguovllu olggobeallái, de ferte smiehttat, ahte gos dat sámegielat árabajásgeassin ordnejuvvo. Dat gáibida álo ovttaskas olbmo miellagiddevašvuođa ja nana oskku dan bálvalusa oažžumii, oaivvilda Torikka.

Máŋga sáhkavuoru

Bearjadaga 7.6. semináras leat hállamen bajásgeassindiehtagiid lisensiáhtta Aimo Aikio, pedagogihka doavttir Rauni Äärelä-Vihriälä, oahpahusdoaimma bajitdárkkisteaddji Kari Torikka Lappi guovlohálddahusdoaimmahagas, bajásgeassindiehtagiid doavttir Marikaisa Laiti, Sámi allaskuvlla veahkkeprofessor Inker-Anni Linkola-Aikio ja Sámi allaskuvlla ja Lappi universitehta doseanta Pigga Keskitalo.

Bearjadaga seminára bistá diibmu 16 rádjái. Seminára streamejuvvo ja dan sáhttá geahččat dáppe.

Lávvardaga 8.6. lea Sámi mánáidgárdeoahpaheaddjiskuvlejumi feasta dii 10–12. Dilálašvuođas leat mielde Sámedikki ságajođiheaddji Tiina Sanila-Aikio, Oulu universitehta skuvlendekána Sari Harmoinen, Oulu universitehta Giellagas-instituhta jođiheaddji Anni-Siiri Länsman, ja musihkkaguossi Hanna-Maaria Kiprianoff. Daid lassin dilálašvuođas gullat oahpahus- ja kulturministeriija ja Sámi oahpahusguovddáža dearvvahemiid.

Lávvardaga ordnejuvvo maiddái Unnamánáid giela gárggiideami doarjun -seminára. Dat ordnejuvvo dii 13–15. Semináras lea hállamen filosofiija doavttir Annika Pasanen, ja son gieđahallá árrabajásgeassima bargiid ja bearrašiid ovttasbarggu giela gárggiideami doarjumis.

Dáhpáhus lea rabas buohkaide, geat leat beroštuvvan sámi árrabajásgeassimis ja dan ovddideamis.

Varrasamosat: Sápmi

Váldoođđasat

Varrasamosat

Muualla Yle.fi:ssä