Sápmi |

Anáris ja Ohcejogas boahtime pop up -boahkuhandilálašvuođat – fargga fállagohtet maiddái goalmmát boahkuheami

Sámeguovllu gielddain leat ordnen pop up -boahkuhandilálašvuođaid, gosa ii dárbbat várret áiggi. Dán vahkus dáhpáhusat leat Anáris ja Ohcejogas. Maiddái goalmmát boahkuid lea fargga vejolaš váldit.

Peruspalvelujohtaja Mirja Laiti Ivalon terveyskeskuksessa.
Boahkuhanávdnasa ii sáhte guhká doallat lieggasis, danin go dat seailu nu heittogit. Danin pop up -boahkuhandáhpáhusaid leat ordnen dušše Anáris ja Avvilis, muitala Anára gieldda rabasdivššu hoavda Mirja Laiti. Govva: Vesa Toppari / Yle

Dán vahkus Anára márkanis ja Ohcejogas lea vejolaš oažžut koronaboahkuid, vaikko ii livččege várren áiggi.

Anára pop up- boahkuhandilálašvuohta lea Sámekulturguovddáš Sajosis buohccedivššáriid vuostáiváldimis gaskavahku 22.9. diibmu 10.00–15.00.

– Mii čuovvut veahá, ahte man olu doppe fitnet olbmot, ja dađi mielde lasi ordnet daid, jus lea dárbu, muitala Anára gieldda rabasdivššu hoavda Mirja Laiti.

Anára gielddas leat maid árat leamašan dákkár nu gohčoduvvon pop up -boahkuhandáhpáhusat, main sáhttá viežžat boahkuid áiggi várrema haga, earret eará gávppis ja dearvvašvuođaguovddážis.

Ohcejogasges leat guokte pop up -boahkuhandilálašvuođa boahtime. Disdaga čakčamánu 21. beaivve ja gaskavahku čakčamánu 29. beaivve diibmu 15.00–18.30 Ohcejoga dearvvašvuođaguovddážis lea vejolaš oažžut koronavirusboahkuid várretkeahttá áiggi.

Pop up -boahkuheamis oažžu juogo vuosttaš dahje nubbi boahkuheami. Vuosttaš boahkuid váldimis lea goit galgan mannat badjel guhtta vahku. Boahkuheapmái sáhttet boahtit badjel 16-jahkásaš ohcejohkalaččat ja maiddái olgobáikegoddelažžat.

Maiddái Soađegili ja Eanodaga gielddain leat ordnen dákkár dáhpáhusaid.

Muoná-Eanodaga jođiheaddji doavttir Teemu Taulavuori muitala, ahte Eanodagas leat geasi áigge moddii ordnen Gilbbesjávrris ja Heahtás pop up boahkuhemiid. Maiddái muhtin lávvordagaid leat dearvvašvuođaguovddáža divššárat boahkuhan olbmuid Gilbbesjávrris.

Goalmmát boahkuheapmi boađi boađi

Suoma stáhta lea ráhkkanan boahkuhit buohkaid badjel 12-jahkásaččaid. Goalmmát boahkuheami fállet vuos olbmuide, geain lea dakkár buozalmasvuohta, mii váikkuha sin immunitehtii, dego ovdamearkan olbmuin, geain lea molsojuvvon váibmu. Nuppi boahkuheami váldimis lea goit galgan gollat unnimustá guokte mánu.

Ohcejoga gielddas goalmmát boahkuheapmái sáhttá juo almmuhit iežas. Telefonnummáriid gávdná Ohcejoga gieldda neahtasiidduin.

Anára gielddas addet goalmmát boahkuheami THL rávvagiid mielde. Olbmot, geat leat garrasit immuvdnaváilevaččat, sáhttet várret áiggi áiggevárrennummáris dahje neahta bokte.

– Mun jáhkán, ahte dás dát de ovdána nu, ahte loahpalaččat muhtumin buohkat leat boahkuhuvvon goalmmát geardde, lohká Laiti.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä