Sápmi |

Anáris leat boahtte bivdobajis ovtta bivdi ala measta beannot ealgga – "Vuordámušhan livččii, ahte veaha ealgalohku geahppanivččii goit dán guovllus"

Lappi guvlui mieđihuvvui dán jagi lagabui 12 000 ealgga bivdolobi.

Keijo Pirttijärvi
Keijo Pirttijärvi Govva: Kirsti Helena Länsman / Yle

Suoma fuođđoguovddáš lea dán vahkus mieđihan boahtte čavčča ealgalobiid. Lappi guvlui mieđihuvvui 11 841 lobi, mii lea measta 30 proseantta eanet go diibmá.

Anárii leat mieđihan njealje geardde eanet ealgalobiid go jagis 2017. Boahtte bivdobajis Anára guovllus oažžu báhčit badjelaš 1400 ealgga. Anára fuođđogáhttensearvi lei ohcan bivdolobi 1100 elgii.

– Suoma Fuođđoguovddáš ja Luondduriggodatguovddáš mieđihedje goittotge badjelaš 300 ealgalobi eanet, dadjá Anára fuođđogáhttensearvvi doaibmajođiheaddji Pertti Vikeväkorva.

Vikeväkorva mielde Anáris leat boahtte bajis ovtta bivdi ala measta beannot ealgga.

Ealggaid meari háliidit geahppedit čuđiin heakkain Norggas.
Govva: riista.fi

Girdilohkamiid mielde Anáris sullii 2500 ealgga eanet go ledje árvalan

Lappi fuođđoguovddáža fuođđohoavda Sami Tossavainen muitala, ahte Luondduriggodatguovddáš dagai dálvet girdilohkamiid Anáris ja lohkama mielde guovllus leat eanet ealggat, go maid ledje árvalan.

– Ovdal leat árvalan, ahte guovllus leat sullii 1500-1600 ealgga ja dál árvalit guovllus leat juobe 4000 ealgga, nu danin loktiime vearuhusa garrasit, muitala Tossavainen.

Tossavainen lohká, ahte easkka de go bivdoáigi lea nohkan, nu dihtet leago 1400 bivdolobi Anára guvlui doarvái. Juohke jagi ealggat lasket ollu, jahkásaččat guovllu ealganálli lassána lunddolaččat juobe duáhiin ealggain.

Maiddai Gihttelis leat dahkan girdilohkamiid ovddit dálvve. Seamma ládje go Anáris lohkamiid vuođul árvaledje guovllus leat eanet ealggat, go maid ledje doivon.

Áŋŋellaš bivdi lea duđavaš, go mieđihedje ná olu lobiid

Angelin Erä várreságadoalli Keijo Pirttijärvi oaidná, ahte lea buorre go dál leat mieđihan eanet lobiid. Son lohká, ahte Áŋŋelis leat hirbmat olu ealggat.

– Dálvet ealggat lávejit čoahkkanit, juovllaid áigge bohtet ja lea measta dego eallu. Áŋŋel gili birra leat máŋga čuođi ja lávejit oidnot juohke sajis. Mis lea suoidnespábba ja dan lávejit mollet ja veahá vahágiid dahkat min rádjeáiddiide.

Jietna: Keijo Pirttijärvi
Jietna
Guldal Keijo Pirttijärvi jearahallama Buorre Iđit Sápmi -sáddagis. Jietna: Yle Areena

Pirttijärvi lohká olbmuin leat fuolla ealggaid dihte ja leage buorre go veahá geahpedit dál ealganáli dien guovllus.

– Vuordámušhan livččii, ahte veaha dat ealgalohku geahppanivččii goit dán guovllus, lohká Pirttijärvi.

Pirttijärvi rávve, ahte goit Áŋŋel-guovllus gánneha jearrat báikkalaččain gos, ja mot ealggaid gánneha bivdit.

Davvi-Suomas ealgabivddu vuosttaš bádji álgá čakčamánu 1. beaivve.

Varrasamosat: Sápmi

Váldoođđasat

Varrasamosat

Muualla Yle.fi:ssä