Sápmi |

Anárlaš guollebivdi illuda guolástanlága nuppástusas – "Giitu buohkaide, geat leat bargan ášši ovdii"

Miessemánu rájes Anára, Ohcejoga ja Eanodaga ássit besset guolástit olles guolástanbaji ovtta bivdobadjelobiin.

Heikki Nikula
Juvdujoga guollebivdi, anárlaš Heikki Nikula illuda guolástanlága nuppástusas. Govva: Gabriela Satokangas / Yle

Suoma riikkabeaivvit dohkkehedje gaskavahku guolástanlága nuppástusa. Nuppástus buorida Anára, Ohcejoga ja Eanodaga gieldda ássiid guolástanvuoigatvuođaid.

Jagis 2016 fápmui boahtán guolástanlága dihte báikkálaš olbmot gárte gilvalit turisttaiguin jándorlobiin, maid vuvde dušše dihto meari.

Geasset 2017 Juvdujohgáttis Anáris dollojuvvui miellačájáhus Meahciráđđehusa lohpevuovdinpolitihka vuostá. Okta miellačájáhusa ordnejeaddjiin lei anárlaš Heikki Nikula. Son illuda varas mearrádusas ja lea giitevaš buohkaide, geat leat bargan ášši ovdii.

– Dieđusge go mun lean johkaguolásteaddji, de gal dat munnje lea stuorra ášši. Lean ságastan áššis earáiguin, ja dat lea olbmuide stuorra ášši. Muhtinge dajai, ahte ii leat máŋgga idjii oađđán, go lea vuordán dan riikkabeivviid šluppoha skoalkkiheami.

– Dát čájeha, ahte lágaid sáhttá nuppástuhttit, jos ášši lea rivttes ja olbmot leat aktiivvalaččat. Mu mielas riekti lea dál ollašuvvan, Nikula jurddaša.

Bivdobadjelobit oastinláhkai miessemánus

Anára, Ohcejoga ja Eanodaga báikkálaš olbmot eai oaččo stággobivdolobi velge áibbas nuvttá. Haddi ii leat vel mearriduvvon, muhto dan leat lohpidan leat govttolaš.

– Jáhkkimis lea sáhka muhtin logiin euroin olles bivdobajis. Go veardidit, ahte jándorlohpi lea guokte geasi leamaš sulaid 30 euro, nu hupmat čielgasit govttolut hattis, muitala eanan- ja meahccedoalloministera politihkalaš veahkkebargi Teppo Säkkinen.

Eana- ja meahccedoalloministara sierraveahkki Teppo Säkkinen
Eana- ja meahccedoalloministara sierraveahkki Teppo Säkkinen. Govva: Kirsti Länsman / Yle

Stággobivddu bivdobadjelobi sáhttá oastit Meahciráđđehusas, ja lohpi guoská ruovttugieldda stáhta čázádagaid, gosa luossa ja dápmot gorkŋot. Vuollel 18-jahkásaččaide lohpi lea nuvttá. Bivdolobiid stággobivdui sáhttá oastigoahtit miessemánu áigge.

Buot gieldalaččat sáhttet háhkat bivdobadjelobi, nappo lobiid mearri ii ráddjejuvvo dihtoeriiguin.

Láhkanuppástusa mielde Meahciráđđehus galgá sihkkarastit guolásteami bistevašvuođa lohpeeavttuiguin, dego sálašráddjehusaiguin. Meahciráđđehus ráđđádallá čuovvovažžan guolásteamis Sámedikkiin ja Davvi-Lappi ráđđádallangottiiguin.

Láhkanuppástusas bidjet maiddái čuovvumušmávssu suollemas bivdui. Láhkanuppástus boahtá fápmui miessemánu álggus.

Heikki Nikula kalastaa Juutuanjoella Inarissa heinäkuussa 2016.
Heikki Nikula guolásta Juvddujoga. Govva: Jarmo Honkanen / Yle

Heikki Nikula jáhkká, ahte dilli šaddá dál dábálažžan. Maŋimuš jagiid son ii leat nu olu guolástan, go lobi oažžun lea leamaš váddásut.

Bivdobadjelohpi dahká báikkálaččaid guolásteami álkibun, go ii dárbbaš oastit lobiid juohke beaivái sierra.

– Mii vuolgit guolástit, go deaivá leat áigi ja buorre dálki, moddjá Nikula.

Varrasamosat: Sápmi

Váldoođđasat

Varrasamosat

Muualla Yle.fi:ssä