Sápmi |

Anárlaš Joni Sellman beana borai márffi, mas lei rievdnu siste – šibitdoavttir rávve, maid galgá bargat, jus beana deaivá borrat bastilis diŋgga

Jus beana deaivá borrat vaikko dakkár márffi, masa lea biddjon juoga bastil, gánneha dalán váldit oktavuođa šibitdoaktárii. Joni Sellman beana gávnnai dákkár márffi Anára girkosiiddas ikte gaskavahku.

koira
Joni Sellmanis ii lean kamera, vai livčče govven beatnaga ja eandalitge márfebihtážiid. Dát govva lea arkiivagovva. Govva: Antti Haanpää / Yle

Anárlaš Joni Sellman lei ikte gaskavahku eahkes váccašeamen beatnagiin Anára girkosiiddas girku buohta, go son fuomášii beatnaga váldán juoidá ártega njálbmái.

– Imaštallen, ahte mii beatnaga njálmmis lea. Dat ii dalán addán dan munnje, dat láve vehá čiegadit.

Go Sellman oaččui beatnaga njálmmis ártegis diŋgga eret, son suorganii.

– Dat lei unna márfi, man sisa lei deddojuvvon rievdnu, dahje iešalddes máŋgage. Čoggen daid dasto doppe eatnamis eret, muitala Sellman.

Sellman almmuhii dáhpáhusas heahteguovddážii, bolesii ja maid elliiddikšunbáikái Avvilii.

Šibitdoavttir: Bihtážiid galgá goaivut eret ja dalán riŋget šibitdoaktárii

Sellmana beana goit gearggai borrat márffi, muhto dat čielggai beanaeaiggádii easka čuovvovaš beaivve. Son imaštalai, go beana ii jur borran biepmu ja gávnnaige vel beatnaga čoddagis rievnnu. Beana álggiige de stoahkat nuppiin beatnagiin ja lea juo borran ja veadjá bures.

Anára gieldda šibitdoavttir Paula Nyberg lohká, ahte jus beana deaivá borrat vaikko dákkár márffi, gánneha dalán váldit oktavuođa šibitdoaktárii.

– Jus beana gávdná juogalágán biebmobihtážiid, de vuos gánneha váldit daid beatnaga njálmmis eret, Nyberg rávve.

Paula Nyberg lea leamaš šibitdoavttirin Anára gielddas dál badjelaš jagi, muhto sutnje ii leat vel oktiige boahtán ovddal dákkár dáhpáhus.

Jus beana orru veadjimin bures, de heahti ii leat, muhto šibitdoaktárii galgá vuolgit

Beatnaga ii oaččošii bidjat ruovttus vuoksit, go bastilis diŋggat soitet báhcit njálbmái dahje čoddagii gitta. Šibitdoavttir oaidná röntgenbiergasiin dárbbu mielde, leago diŋga báhcán gitta. Goittotge ovdamearkka dihte Avvilis röntgen ii leat, ja dan várás beatnaga galgá sáddet Soađegillái.

– Vaikko sáhka lea bastilis diŋggas, de dat ii álo dagat váttisvuođaid. Muhto šibitdoaktárii gánneha vuolgit, jus lea diehtu dahje navdá, ahte ealli lea njielastan nálu, dadjá Nyberg.

Nyberg čilge, ahte jus beatnaga ollislaš veadjin orru leamen buorre, de dalle ii leat stuorát heahti. Dalle beana oažžu maid borrat veháš litna biepmu ja juhkat čázi, daiguin ii daga váralaš dili beatnagii. Dainna ládje maiddái bastilis diŋga ii leat áidna, mii beatnaga čoavjjis jorrá.

– Jus beana ovdamearkka dihte ruohkká njálmmi dahje čoddaga, dahje ii njielas dábálaččat, de dalle sáhttá leat hoahppu.

Joni Sellman lea ain veháš hirpmástuvvan ja imaštallá, mo giige sáhttá bargat dákkár daguid. Boahttevuođas son áigu leat dárkilut, amas sullasaš dáhpáhus geavvat ođđasit.

Yle Sápmi ii fáhten bolesa kommenteret ášši.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä