Sápmi |

Anerca-ealligovva vahkuloahpa Sámis – čalmmustahttá modearna álgoálbmotkultuvrra

Filmmas dánsuba maiddái jumežat Kátjá ja Biret Haarla.

Anerca -elokuva.
Filmmas háliidit buktit ovdan sámekultuvrra ođđa hámiid, nugo dálá dánsuma. Govva: Markku ja Johannes Lehmuskallio

Anerca - Elämän hengitys (sá. Eallima vuoigŋan) čájehuvvo vahkuloahpa áigge Sámis.

Filbma muitala davviguovllu álgoálbmotkultuvrrain ja sin eallinvuogis, nu maiddái sámiin. Filmma leaba bagadallan Markku ja Johannes Lehmuskallio.

Bagadalli Markku Lehmuskallio muitala, ahte sii leat govven earret eará Álaskka, Kanada, Siberia ja Ruonáeatnama álgoálbmogiid. Ulbmilin lea čájehit dáid olbmuid kultuvrra ja vugiid buktit iežaset ovdan.

– Sin vuoiŋŋa fápmu, dan birra muitaluvvo dán filmmas. Olbmot muitalit das ieža jogo lávluma, musihka, performánssa, dahje dánsuma bokte, Markku Lehmuskallio muitala.

Lehmuskallio muitala, ahte Anerca mearkkaša inuihtaid gillii vuoigŋama ja sin jurddašanvuogis dikten lea sielu vuoigŋan.

Filmmas čájehit modearna sámekultuvrra

Markku Lehmuskallio háliidii filmmas buktit ovdan maiddái sámekultuvrra ođđa hámiid, das go suopmelaččain sáhttá leat oalle boaresáigásaš govva sámekultuvrras. Son bivddii jumežiid Kátjá ja Biret Haarla dánsut filmmas.

– Šattai jurdda, ahte dálá dánsun lea oalle guhkkin dakkár árbevirolaš govas sápmelašvuođas ja dat livčče buorre dása, ja de jumežat vulggiiga dasa, Markku Lehmuskallio muitala.

Anerca -elokuva.
Nenetsa Jegoro Jadne lea maid mielde ealligovas. Govva: Markku ja Johannes Lehmuskallio

Bagadalli Markku Lehmuskallio lea govven álgoálbmogiid jo sullii 40 jagi. Su geasuha álgoálbmogiid máŋggabealat kultuvra, mii šaddá dan vuolggasajis ja birrasis, gos eamiálbmogat ellet.

Sáhttá orrut, ahte davi garra guovlluin lea váttis birget, muhto liikká álgoálbmogat dahket dan.

– Dat kultuvrrat leat liikká birgen jahkečuđiid ja sidjiide lea šaddan dakkár allakultuvra justa dan eallinguovllus gos sii ellet.

Filbma čájehuvvo Ohcejogas lávvardaga ja Anáris sotnabeaivve

Filmma nubbi bagadalli Markku Lehmuskallio lea mielde vahkuloahpa filbmačájáhusain ja suinna ságastallat filmma birra.

Anerca - Elämän hengitys čájehuvvo otne bearjadaga Roavenjárggas diibmu 16.30, ihttin lávvardaga Ohcejogas diibmu 18 Davvenásti-filbmateáhteris ja sotnabeaivve vuos Anáris Sámekulturguovddáš Sajosis diibmu 13 ja de Avvilis diibmu 16.30 filbmateáhter Aslakis. Boahtte vahku vuossárgga filbma lea oaidninláhkái Soađegilis diibmu 18 filbmateáhter Lapinsuus.

Filbma lea ožžon vuosttaseahkeda borgemánus.

Varrasamosat: Sápmi

Váldoođđasat

Varrasamosat

Muualla Yle.fi:ssä