Säämi |

Anna Morottajast álgá vuossaargâ oho kukkosâš livđemätki – iälá neelji kaavpugist Oulust, Tamperest, Helsigist já Ruávinjaargâst

Stuárráámus uási liivđijn láá arkkâdduvâin kavnum, mut mieldi lii mottoom uđđâ livđe-uv.

Anna Morottaja
Ánná Morottja livđo neelji kaavpugist puáttee ohhoost. Govva: Anja Kaarret / Yle

Livđojeijee Anna Morottaja lii vuálgám oho pištee livđemáátkán. Kuássin ovdil ij lah uárnejum nävt kukke já nuuvt maaŋgâ sajest tollum livđetápáhtume.

Taiđuu ovdedemkuávdáš TAIKE koijâdij suu, et vuálgáččij-uv škovlâlijd muštâliđ livđeest. Juurdân lii uážžuđ kaavpugsämmilijd kulttuurlii tooimâ.

– Hoksájim, et siämmásthân puávtáččij meid eehidkonserttijd orniđ, muštâl Morottaja.

Ohtuu máátkán

Morottaja vuálgá ohtuu, iäge sust lah čuojânâsah fáárust, tuše suu jienâ. Konsert pištá suullân tijmepele já stuárráámus uási liivđijn láá arkkâduvâin kavnum. Fáárust lii meid mottoom Ááná jieijâs rähtim livđe. Iäge tábáhtumeh lah siämmálágáneh, sáttá kulluđ olâttâs.

– Jos veik keččein lii mottoom skippáár, kiän äijih liivđe mun tuubdâm, et puáhtá leđe, et tot puátá talle paijeelmiärálâžžân, loppeed Morottaja.

Peiviv škovlâliih já párnááh kuleh livđijd já ehidist peessih puárásub ulmuuh servâđ mieldi. Kaavpug sämmilij säämi länitaidâr Milja Guttorm lii orniistâllâm paaihijd, kost luvđuumân puáhtá uápásmuđ. Sij láá porgâm ovtâspargo škovlâi já peivitipšopaihijkin.

– Tot lai älkkee valjiđ toid škovláid já tipšopaaijâd, kost lijjii sämikielâliih párnááh, muštâl Guttorm.

Anna Morottaja
Anna Morottaja vyelgimin livđemáátkán. Govva: Anja Kaarret / Yle

Puoh sajeh láá váháš ereslágáneh. Oulust tábáhtume lii onne vuossaargâ taggaar sajest ko Tuba, tobbeen läävejeh bäändih leđe čuojâtmin. Tamperest tot lii koskoho uáivikirjerááju Metsost, tuorâstuv Helsigist Hakaniemen virastotáálu siisâpuáttim aulast já pasepeeivi Ruávinjaargâst kulttuurtáálu Wiljamist, puáris elleekoveteatterist.

– Helsigist saje lii váhá oomâs, mut tohon lai vaigâd kavnâđ hiäivulii pääihi, ko tääl lii uccjuovlâ- äigi, muštâl Morottaja.

Áánást almostuvá livđeskiärru val ovdil juovlâi.

Varrasamosat: Säämi

Váldoođđasat

Varrasamosat

Muualla Yle.fi:ssä