Sápmi |

Ánnámáret Ensemble ohcá eaktodahtolaččaid musihkkavideoi

Ánnámáret Ensemble lea ráhkadeamen musihkkavideo "Sálbma" nammasaš bihttái. Anna Näkkäläjärvi-Länsman lea ovttas Katja Gauriloffain plánen musihkkavideo dahkama, ja dál Facebookas bovdet olbmuid mielde musihkkavideo bargamii.

Jietna: Ánnámáret ensemble
Jietna

Musihkkavideo govvemat leat lávvordaga 12.8. Stuorrageađgeváris Njuorggámis, Buolbmátjávrregeainnu guoras. Buohkat leat buresvoahtán video govvemiidda.

– Mun sávan ahte ollu earálágan olbmot bohtet. Nuorat, rávesolbmot, boaresolbmot, mánát, nissonat, dievddut. Ja dieđusge buot etnisitehtat ahte sápmelaččat, suopmelaččat, norgalaččat, geat beare, muitala Anna Näkkäläjärvi-Länsman.

Näkkäläjärvi-Länsman muitala musihkkavideoprošeavtta vuolgán johtui go son oahpásmuvai Katja Gauriloffain diibmá Ijahis ijas, go Ánnámáret Ensemble skearru Gollhelmmot almmustuvai.

– Gauriloff lei guldaleamen min almmustahttinkonseartta. De čuojahin sutnje min skearru ja jerren sus, ahte livččiigo doppe oktage dakkár lávlla, mii buvttášii sutnje jurdagiid. Juste dan perspektiivvas, ahte jos ráhkadivččii musihkkavideo, jos son vuolggášii bagadallin. Son guldalii dan skearru ja logai ahte dat Sálbma-bihtá lea su mielas hui fiinnis, ahte son gal hui mielas vuolggášii mielde ráhkadit dan video.

"Teaksta govvida oktavuođa"

Katja Gauriloff lea musihkkavideo giehtačálli, ja leage giehtačállán dasa máŋggalágán earálágan elemeanttaid.

– Okta lea dakkár, masa mii dárbbašit ollu olbmuid mielde. Dat lea namalassii dan dihte, go dat lávlaga teaksta govvida oktavuođa, mii mis lea riikkarájáid rastá sámiin. Ja ahte mii sáhtášeimmet ovttas bargat, ahte mii nanusmuvvat ja min kultuvra seailu nanusin maiddái boahttevuhtii. Dan govvida filmmas dat, go mis leat ollu earálágán olbmot das mielde.

Näkkäläjärvi-Länsman oaivvilda ahte lea stuorra hástalus oažžut olu olbmuid dohko báiki ala.

– Ferten eaktodáhtolaččaid dáhttut, go ii leat dakkár smávva dáiddaprošeavttas nu olu ruhta. Muhto mun sávan mun gávnnan dan veaga dohko, vai mii beassat ollašuhttit dan Katja fiinna idea.

Čiekŋalut mearkkašupmi

Anna Näkkäläjärvi-Länsman oaivvilda ahte lea stuorra mearkkašupmi oažžut oidnosii iežas musihkka dán video bokte. Son oaidná video maiddái dáiddalaš prošeaktan.

– Dat lea nu fiidnát giehtačállojuvvon, de das šaddá nugo dakkár unna ealligovva. Dat ii leat dušše musihkkavideo, muhto das lea dakkár čiekŋalut mearkkašupmi. Ahte dan láhkái das leat máŋggalágán ulbmilat.

– Lea fiinna ášši ahte beasan buktit iežan musihkka dan bokte oidnosii, muhto vel eambbo fiinnis, ahte mii oažžut ráhkadit fiinna ealligova ovtta Katja Gauriloffain. Ja ollašuhttit dan su idea mii lea hui fiinnis. Ja vel dakkár mii buktá olu olbmuid oktii ja bidjá min smiehttat dan min boahttevuođa ja mo mii galgat dán áiggis bargat vai mii ceavzit. Mu mielas dat lea buot deháleamos sisdoallu mii das lea.

Eanet dieđu musihkkavideos gávnnat dáppe.

Anna Näkkäläjärvi-Länsman lei mielde Dearvva-sáddagis 12.7.2017.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä