Sápmi |

Anne Nuorgam oaččui Ekofoandda Pekka Kuusi -bálkkašumi – "Háliidit bálkkašumiin doarjut Nuorgam eamiálbmogiid rivttiid bealušteames"

Ovddit Pekka Kuusi -bálkkašumi oaččui presideanta Tarja Halonen.

Ekofoandda stivrra ságadoalli Sauli Rouhinen ja hálddahusráđi ságadoalli Mikko Pyhälä juolludedje bálkkašumi Anne Nuorgamii duorastaga 14.11.2019 Helssegis.
Ekofoandda stivrra ságadoalli Sauli Rouhinen ja hálddahusráđi ságadoalli Mikko Pyhälä juolludedje bálkkašumi Anne Nuorgamii duorastaga 14.11.2019 Helssegis. Govva: Ekosäätiö

Riektediehtagiid magisttar ja sámepolitihkkár Anne Nuorgam lea bálkkašuvvon Ekofoandda dahjege Ekosäätiö Pekka Kuusi -bálkkašumiin. Bálkkašupmi juolluduvvui Nuorgamii ikte duorastaga Helssegis guovddášgirjerádju Oodis Ekofoandda ságastallandilálašvuođa oktavuođas.

Nuorgam lea leamaš Suoma Sámedikki lahttu jagi 2000 rájes. Son lea bargan Sámiráđi ságadoallin ja lea dan oktavuođas ovddastan sápmelaččaid earret eará Árktalaš ráđis. Dál son ovddasta árktalaš eamiálbmogiid, sápmelaččaid ja inuihtaid ON eamiálbmogiid bissovaš foruma lahttun bajis 2017–2022 ja lea leamaš bissovaš foruma ságadoalli giđa 2019 rájes.

– Ekofoanda háliida bálkkašumiin doarjut Anne Nuorgam eamiálbmogiid ja erenoamážit sápmelaččaid rivttiid bealušteames, foanda dieđiha.

"Mieđihuvvon olles sámeservodahkii"

Anne Nuorgam illuda bálkkašumis. Su mielas dákkár bálkkašumit dorjot eamiálbmogiid dáistaleami rivttiideaset ovdii.

– Lean hui ilus ja duđavaš. In dovdda, ahte mun okto lean dán bálkkašumi ožžon baicce dat lea mieđihuvvon olles sámeservodahkii, dadjá Nuorgam.

Son oaidná maid erenoamáš dehálažžan dan, ahte Suomas leat fuopmášan, man dehálaš lea doarjut ja bealuštit maiddái eamiálbmogiid rivttiid.

Bálkkašupmi juolluduvvo suvdilis ovdáneami ovddideamis

Ekofoanda lea 1990-logu álggus vuođđuduvvon Pekka Kuusi muitofoanda. Dan ulbmil lea doarjut dieđalaš dutkamuša ja eará doaimmaid ekologalaččat suvdilis ovdáneami ovdii.

Kuusi lei suopmelaš politihkkár, guhte 1960-logus áŋgirušai Suoma sosiála- ja servodatpolitihka ovdii.

Ekofoanda lea juolludan Pekka Kuusi -bálkkašumi jagi 1993 rájes 14 geardde. Ovddit bálkkašumi oaččui presideanta Tarja Halonen. Ekofoandda neahttasiidduin sáhtát geahččat, geat earát leat ožžon dán bálkkašumi.

Varrasamosat: Sápmi

Váldoođđasat

Varrasamosat

Muualla Yle.fi:ssä