Sápmi |

Anne Nuorgam oažžu jagi 2021 ON ustit -gudnemáinnašumi: "Dat lea fuopmášupmi oppa sámi álbmogii"

ON eamiálbmogiid bissovaš foruma ságadoalli Anne Nuorgam illuda gudnemáinnašumis. Son lea bargan guhká ON álgoálbmotorgánain.

Vuoden 2021 YK:n ystävä -kunniamaininnan saanut Anne Nuorgam
Anne Nuorgam illá jáhkká duohtan, ahte son oažžu ON ustit -gudnemáinnašumi. Govva: Antti Kolppo / Yle

Guldal maid Anne Nuorgam jurddaša gudnemáinnašumi oažžumis. Jietna: Sáárá Seipiharju / Yle

Ovttastuvvan našuvnnaid eamiálbmogiid bissovaš foruma ságadoalli Anne Nuorgam Ohcejogas lea válljejuvvon jagi 2021 ON ustit -gudnemáinnašumi oažžun. Son lea hui movtta fuomášumis ja dat lei sutnje vuordemeahttun, jáhkkemeahttun ođas.

– Dát lea iešalddes fuopmášupmi oppa sámi álbmogii. Dainna ON-lihttu gudnejahttá buohkaid daid barggu, geat barget sápmelaččaid vuoigatvuođaid ovdii, dadjá Nuorgam.

Nuorgam lea guhká doaibman Sámiráđi ja Sámedikki ovddasteaddjin ON:s, guhtta jagi ON álgoálbmotfoanddas ja maŋimuš vihtta jagi álgoálbmogiid bissovaš forumis.

Helena Laukko
Suoma ON-lihtu doaimmajođiheaddji Helena Laukko mielas lei lunddolaš válljet Anne Nuorgama gudnemáinnašumi oažžun. Govva: Tomi Westerholm / Acamedia

Suoma ON-lihtu doaimmajođiheaddji Helena Laukko muitala, ahte Leave no one behind -prinsihpa lea dehálaš sin lihttui ja danin sii háliidit čalmmustahttit eamiálbmogiid vuoigatvuođaid.

ON-lihtu mielde Anne Nuorgam lea bargan mearkkašahtti barggu sápmelaččaid vuoigatvuođaid ovddideaddjin ja ON eamiálbmogiid bissovaš foruma ságadoallin. Danin lea lunddolaš nammadit su viđát gudnemáinnašumi oažžun, dadjá Laukko.

Laukko jáhkká, ahte gudnemáinnašumi geažil sis lea birra jagi vejolašvuohta muitalit eamiálbmotforuma barggus ja das, mo ON sáhttá foruma bokte ovddidit eamiálbmogiid rivttiid.

– Sihkkarit min oktasaš ulbmilin lea doalahit sihke sápmelaččaid ja eamiálbmogiid vuoigatvuođaid oidnosis, muhto maiddái dan, mo ON sáhttá dain áššiin doaibmat ja doarjut daid proseassaid iešguđege riikkas.

Nuorgam illuda, ahte gudnemáinnašumi oažžu válljejeaddjit leat oaidnán sápmelaččaid doaimmaid ja álgoálbmogiid mearkkašumi Ovttastuvvan našuvnnaid dásis.

Golbma Suoma presideantta ožžon gudnemáinnašumi

ON ustit -bálkkašupmi lea mieđihuvvon jagi 2017 rájis. Anne Nuorgama ovdal Suomas leat golbma presideanta ožžon ON ustit -gudnemáinnašumi. Presideanttat Tarja Halonen, Sauli Niinistö ja Martti Ahtisaari. Diibmá bálkkašumi oaččui professor Eeva Furman.

Nuorgam jáhkká, ahte son ii leat várra oba fihttenge, ahte maid dat oaivvilda. Son lea goit hui vuollegis ja giitevaš mielain váldimin gudnemáinnašumi vuostá.

Jagi ON ustit -gudnemáinnašupmi mieđihuvvo dál viđát geardde. Gudnemáinnašumi mieđihit Suoma ON-lihttu ja ON ustibat -fierpmádat.

Beaivvi ságaid ja Yle Ođđasiid Sámis sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä