Sápmi |

Anne Olli evttohassan jagi hbtiq-aktivistan – "In mun vel leat kánske áivve ádden, ahte mii lea dáhpáhuvvamen"

- Sápmi Pride válddii gal olu mu eallimis ja energiija, muhto gal dat lea addán olu eanet go válddii, smiehttada Olli guhte lea evttohassan jagi hbtiq-aktivistan.

Anne Olli
Govva: Ville Fofonoff / Yle

Anne Olli, 24, Avvilis eret lea evttohassan jagi hbtiq-aktivistan. Olli lei váldolágideaddjin diibmá Sápmi Prides Anáris, mii lea buktán sutnje evttohasvuođa dán gilvvus.

– Son lea leamaš mielde ordnemen sápmelaččaid pridedáhpáhusa ja buktán oidnosii unnitlogu unnitlogu nappo sápmelaš seksuála- ja sohkabeallevehádagaid, čilge artihkkalistis QX-bláđđi Anne Olli evttohasvuođa.

Hbtiq oaivvildá seksuála- ja sohkabeallevehádagaid. Hbtiq-tearbma boahtá sániin homo, bi, trans, intersohkabeallálaš ja queer.

Olli: "In mun vel leat áivve ádden"

Sápmi Pridei gulai dehálaš oassin ovdamearkka dihtii ráidovázzin Anára markánis sihke iešguđet bargobájit. Olli lohká, ahte go ordnii mannan jagi Sápmi Pride de lei dat sutnje olles eallin dalle measta olles jagi.

– Dát mearkkaša munnje hui olu, ahte dat mu garra bargu lea fuomašuvvon duoppe, duon dásisge, illuda Olli.

Sápmi Pride
Govva: Ville-Riiko Fofonoff / Yle

Son dadjá lea gal hirbmat giitevaš evttohasvuođas. Go lei ožžon dieđu, logai son máŋgii sáhttágo diehtu leat áibba riekta. Illá jáhkii son evttohasvuhtii ja dasa, ahte duođaige su namma čuožžui dan kategoriijas.

– Galhan dat lea gelddolaš! lohká Olli evttohasvuođastis

– In mun vel leat kánske áivve ádden, ahte mii lea dáhpáhuvvamen.

Sápmi Pride attii olu eanet go válddii

Vehádagaid vehádagat, dego sápmelaš queer-olbmot, eai Olli mielas boađe oidnosii doarvái olu, dušše dalle, go lea vaikke pride-dáhpáhus.

– Muđui lea gal hui jaskat. Ii gal hirbmasit oidno medias dahje gostege eará sajisge, oaivvilda Olli.

Sápmi Pride
Sápmi Pride -ráidovázzin Anáris 2017. Govva: Ville-Riiko Fofonoff / Yle

Sápmi Pride lei Ollii vuosttaš dáhpáhus, man son ieš lea ordnen álggus gitta loahpa rádjái. Son háliidii, ahte dáhpáhus boahtá namalassii Anárii ja Suoma beallái. Danin son válddii barggu.

– Bargu válddii hui olu mu eallimis ja energiijas, muhto dat lea addán hui olu eanet go válddii, čilge Olli.

Hbtiq-aktivisma lea garra bargu Olli mielas, dasa dárbbaša roahkkatvuođa ja dan, ahte duođaige čuožžu daid áššiid duohken maid buktá ovdán. Ferte maid háliidit bargat daid ovdii.

Jienasteapmi álgá borgemánu álggus

QX lea davviriikkaid stuorimus “gay-bláđđi” nappo dat gieđahallá seksuála- ja sohkabeallevehádagaide guoskevaš áššiid. QX Awardsis leat mielde oktiibuot 15 sierra kategoriija ja kategoriijat evttohasaiguin leat ovdanbuktojuvvon bláđi neahttasiidduin.

Jienasteapmi álgá borgemánu 8. beaivve. Vuoittit almmuhuvvojit QX Awards -dáhpáhusas Glorias Helssegis lávvordaga, borgemánu 25. beaivve.

Divvojuvvon 27.7.2018 dii 14:38: Jienasteapmi álgá borgemánu 8. beaivve iige borgemánu 6. beaivve, nu mot árat muitaleimmet.

Varrasamosat: Sápmi

Váldoođđasat

Varrasamosat

Muualla Yle.fi:ssä