Sápmi |

Anne Olli válljejuvvui Seta stivrii vuosttaš sápmelažžan: "Áiggun bargat arvedávgesápmelaččaid buresbirgejumi ovdii"

Olmmošvuoigatvuođaorganisašuvdna Seta válljii ođđa stivrras mannan vahkuloahpa. Anne Olli oaččui stuorámus jietnameari.

Anne Olli, Seta
Anne Olli válljejuvvui Seta stivrii jienasteami stuorámus jietnameriin. Govva: Riikka Petäsnoro

Arvedávgesápmelaš Anne Olli lea válljejuvvon olmmošvuoigatvuođaorganisašuvnna Seta stivrra áitosaš lahttun. Son lea vuosttaš sápmelaš Seta stivrras.

Seta lea olmmošvuoigatvuođaorganisašuvdna, man ulbmilin lea ovttaveardásašvuohta beroškeahttá olbmo seksualitehtas, sohkabealleidentitehtas dahje sohkabeali ovdanbuktimis.

Hálida bargat arvedávgesápmelaččaid buresbirgejumi ovdii

Anne Olli válljejuvvui diibmá jagi arvedávgenuorran ja jagi LHBTIQ-aktivistan. Olli lágidii maid jagi 2017 Anáris ordnejuvvon Sápmi Pride -dáhpáhusa.

Olli muitala, ahte áigu bargat eandalitge arvedávgesápmelaččaid ja boaittobealguovlluid arvedávgeolbmuid buresbirgejumi ovdii.

– Seta doaimmaid váikkuhusat eai dál oro ollemin doarvái davás. Dálhan mis lea diená buorre dilli, ahte nuppi várreságadoallisge lea áddejupmi ja iežas vásáhus das, makkár dilli lea davvin, Olli lohká.

Son maid sávvá, ahte barggus mielde diehtu sámiid birra lassánivčče arvedávgeolbmuid gaskkas. Olli maid niegada ovttasbarggus máŋggalágán vehádaga vehádagaid gaskkas, degomat arvedávgesápmelaččaid, arvedávgerománaid dahje arvedávgemuslimiid gaskkas.

Stuorimus jietnamearri

Seta stivra čuovvovaš guovtti jagi badjái válljejuvvui ovddasteaddjičoahkkimis mannan vahkuloahpa Joensuus. Ovddasteaddjičoahkkin lea Seta alimus mearridanorgána.

Olli lei ovddasteaddjičoahkkima jietnahárát: 61 olbmos su jienastedje 50, go juohkehaš sáhtii jienastit golmma sierra evttohasa.

– Dat lea hui stuorra mearri dákkár olbmui, gii ii leat ovdal leamašan evttohassan, inge mun leat nu olu váikkuhan Seta vuolde ovdal, illuda Olli.

– Dat dieđusge muitala, ahte olbmot leat gullan mu birra ja sis gávdno luohttámuš munnje.

Varrasamosat: Sápmi

Váldoođđasat

Varrasamosat

Muualla Yle.fi:ssä