Sápmi |

Anni-Sofia Niittyvuopio ja Anni Ahlakorpi Ohcejogas válljejuvvuiga Gurutlihtu bellodatstivrii – čohkkiiga stuorámus jietnameari

Ohcejohkalaš ovddasteaddjiguoktá áiguba loktet ovdan sámeáššiid bellodaga siste.

Anni Ahlakorpi, Henri Ramberg ja Anni-Sofia Niittyvuopio
Gurutlihtu bellodatstivrra lahtut 2019–2023 Anni Ahlakorpi ja Anni-Sofia Niittyvuopio, ja sudno gaskkas bellodatráđđehusa lahttu ja Lappi bire ságadoalli Henri Ramberg. Govva: Vasemmiston Lapin piiri

Suoma Gurutlihtu bellodatčoahkkin válljii lávvardaga ođđa bellodatnjunnošiid badjái 2020–2023. Dán háve Gurutlihtu bellodatstivrii besse guokte sámeáššiid ja sámeguovllu ovddasteaddji, go bellodatstivrii válljejedje almmolaš ovddasteaddjin gáregasnjárgalaš Anni-Sofia Niittyvuopio ja ohcejohkalaš Anni Ahlakorpi.

Bellodatstivra árvvoštallá bellodaga politihkalaš ulbmiliid ja strategiija. Stivra čoahkkana guktii jagis ja das lea bellodaga bajit mearridanváldi bellodatčoahkkimiid gaskkas.

Oktiibuot Gurutlihtu bellodatstivrras leat 55 lahtu. Viđas leat almmolaš ovddasteaddjit ja guovlluid mielde lahtut leat 50.

Almmolaš ovddasteaddjiid válljejedje jienastemiin. Báikki alde ledje birrasiid 300 lahtu ja juohkehaš oaččui jienastit unnimustá vihtta evttohasa. Ahlakorpi oaččui eanemus jienaid, 182 jiena, ja Niittyvuopio nubbin eanemus, 138 jiena.

– Orru hui somá. Dál Gurutnuorat ja Gurutlihttu leat čájehan, ahte sii háliidit bargat sámepolitihka ja sámiid iešstivrema ovdii, dadjá Niittyvuopio.

Ovddidišgoahtiba earret eará sámeoahpahusa ja sámegielat sode-bálvalusaid

Anni-Sofia Niittyvuopio áigu ovddidit bellodagas ILO 169 -soahpamuša ratifierema ja sámediggelága rahpama. Dat leat maiddái biddjon dál bellodaga politihkalaš prográmmii. Dasa lassin Niittyvuopio atná dehálažžan skuvlaáššiid, dego oahpaheaddji- ja oahppamateriáladili.

Anni-Sofia Niittyvuopio
Gáregasnjárgalaš Anni-Sofia Niittyvuopio lea leamaš máŋga jagi Suoma Sámi Nuoraid doaimmas mielde ja lea dál movttáskan maid riikkadási politihkas. Govva: Kirsti Länsman / Yle

Anni Ahlakorpi lea leamaš Gurutlihtu bellodatstivrra lahttu maiddái bajis 2016–2019 Lappi guovllu ovddasteaddjin. Seamma bajis anárlaš Lauri Titola leamaš bellodatstivrras almmolaš ovddasteaddjin.

Ahlakorpi lea movtta, ahte beassá joatkit barggu bellodatstivrras. Maiddái su mielas orru, ahte bellodagas atnet árvvus sápmelaččaid ja davvi olbmuid oainnuid. Son oaidná, ahte dál, go Gurutlihttu lea Suoma ráđđehusas, bellodagas lea eanet mearridanváldi.

Anni Ahlakorpi
Anni Ahlakorpi ovddastii mannan bajis Lappi guovllu Gurutlihtu bellodatstivrras. Dál son jienastuvvui almmolaš lahttun čuovvovaš badjái. Govva: Susanna Guttorm / Yle

– Dál go mii leat ráđđehusbellodat, sávan, ahte mun basttán buktit ovdan uhca gielddaid ja eandalii sámeguovllu gielddaid jiena ja sihkkarastit, ahte sámegielat sode-bálvalusat sihkkarastojuvvojit ja ožžot dan sierraruhtadeami, man dat dárbbašit.

– Leat olu earátge dehálaš áigeguovdilis áššit, dego sámediggelága ođasmahttin ja Deanu soahpamuša buorideapmi, dadjá Ahlakorpi.

Sámi ovddasteaddjit leat unnán bellodagaid njunušbáikkiin

Sámeáššiid ovddideaddjit eai leat olu bellodagaid njunušbáikkiin. Moadde ovddasteaddji goit leat bellodagaid doaimmain mielde.

Ohcejohkalaš Sammol Lukkari lea Ruoŧŧelaš álbmotbellodaga bellodatstivrra lahttu bajis 2019–2021. Veikko Guttorm Ohcejogas fas lea Guovddášbellodaga bellodatstivrra várrelahttu bajis 2018–2020.

Sámeguovllu gielddain guovddášbellodaga bellodatstivrras leat guokte ovddasteaddji, soađegillilaš Arja Mäkitalo ja anárlaš Aleksi Kinnunen. Guovddášbellodaga lappilaš riikkabeaiáirasiin Markus Lohi lea bellodatstivrra aitosaš lahttu ja riikkabeaiáirras Eeva-Maria Maijala bellodatráđđehusa várrelahttu.

Sosiálademokráhtalaš bellodaga, olgešbellodat Kokoomusa, Vuođđosuopmelaččaid, Ruoná lihtu ja Kristtalašdemokráhtaid bellodatstivrras dahjege bellodatráđđehusas eai lea sámeovddasteaddjit.

SDB bellodatráđđehusas bajis 2017–2020 Lappi ovddasteaddjin čohkká roavvenjárgalaš Maria-Riitta Mällinen, guhte lea studeren davvisámegiela ja lea nákkosdutkamušastis dutkamin kultursensitiiva turismma sámeguovllus.

Ruoná lihtu bellodatráđđehusa várreságadoalli bajis 2019–2021 lea soađegillilaš Riikka Karppinen, guhte rikkabeaiválggain oaččui Lappi válgabires nubbin eanemus jienaid, muhto bázii goittotge riikkabeaibáikki haga.

Varrasamosat: Sápmi

Váldoođđasat

Varrasamosat

Muualla Yle.fi:ssä