Sápmi |

Annin Suivakko lea heargegonagas 2019 – Geahča Anára gonagasgilvvu ja njoarosteami bohtosiid dás

Juha Vuolab ja Anni Portimo heargi Annin Suivakko Báišduoddara bálgosis ruohtai gonagassan. Eira ja Sara faskiiga vuoittu njoarosteamis.

Anninsuivakko
Annin Suivakko lea dán jagi heargegonagas. Govva: Kaija Länsman / Yle Sápmi

Dán vahkoloahpa ordnejedje heargegonagasgilvvuid 67. geardde Anáris, Anárjávrri jieŋa alde.

Dán jagi heargegonagassan ruohtai Juha Vuolab ja Anni Portimo oamastan Annin Suivakko, Báišduoddara bálgosis. Vuoddjin lei Marko Tervaniemi. Annin Suivakko ruohtai 2 000 mehtera áiggis 3:47,406.

Annin Suivakko hárjeheaddji Mauri Portimos lei eallima guhkimus gilvu otne. Portimo gárttai vuordit vuoittu čielgama gitta dassái go maŋimušge heargi lei ruohttan molii. Lávvardaga buoremus áiggi ruohttan Asko Länsman ja Tomi Vartiainen Spiella-heargi ii nákcen vuoitit gonagasvuođa.

– Annin Suivakko ruohttá álggus dan iežas fártta, muhto loahpa dat boahtá áli garra leavttuin. Ammal nealgi bidjat ruohttat loahppamátkki. Dat lea loahppamehteriin hui nana heargi, govvida Portimo hearggis.

Portimo ii leat goassige ovdal vuoitán gonagasvuođa. Dál lei easkka nubbi geardi, go su heargi beasai ruohttat 24 buoremus hearggi joavkkus ja gilvalit gonagasvuođas.

Oktiibuot 116 hearggi ruhtte Anárjávrri jieŋa alde dán vahkoloahpa

Gonagasgilvvuide oassálaste oktiibuot 116 hearggi, main 24 hearggi gilvaledje gonagasluohkás. Gonagasluohkái besse gilvalit dat hearggit, mat birgejedje buoremusat dán giđa Boazocup-oassegilvvuin.

Dá leat gonagasluohkká vihtta buoremusa:

HeargiOamasteaddjiBálggusVuoddjiÁigi
1. AnninsuivakkoJuha Vuolab, Anni PortimoBáišduottarMarko Tervaniemi3:47,406
2. HymynkareKrupula, PetäjäjärviIsosydänmaaEero Päkkilä3:48,465
3. MyrskyOssi UusitaloPalojärviNiko Kovalainen3:48,780
4. SpiellaAsko Länsman, Tomi VartiainenGálddoaiviUula-Petteri Somby3:48,784
5. LeilantähtiHarri MattiPalojärviAntti Pätsi3:48,886

Dárkilut bohtosiid maiddái báhkka- ja rabasluohkkáin oainnat dás.

Sara ja Eira faskiiga vuoittu njoarosteamis

Gonagasgilvvuid oktavuođas ordnejuvvon njoarostangilvvu albmáid luohká vuittii kárášjohkalaš Jon Andreas Eira, Gollevári orohagas. Nissoniid luohká vuittii lismálaš Marjinga Sara, Sállevári bálgosis.

Dá leat njoarostangilvvu golbma buoremusa albmáin ja nissoniin:

Albmát

1. Jon Andreas Eira, Gollevárri, 01:45,690

Jon Andreas Eira
Jon Andreas Eira Govva: Vesa Toppari / Yle Sápmi

2. Niko Näkkäläjärvi, Näkkälä, 02:12,000

3. Lemet Aslat Eira, Gollevárri, 02:15,430

Nissonat

1. Marjinga Sara, Sállevárri 02:10,400

Marjinga Sara
Marjinga Sara Govva: Vesa Toppari / Yle Sápmi

2. Kirsi Mäkitalo, Sattasniemi, 02:16,520

3. Piia Magga, Muotkeduottar, 02:33,080

Beaiváduvvon 31.3.2019 dii 16:30: Mauri Portimo kommeanta lasihuvvon.

Varrasamosat: Sápmi

Váldoođđasat

Varrasamosat

Muualla Yle.fi:ssä