Sápmi |

Antti Aikio lea válljejuvvon Sámedikki láhkačállin

Virgái ledje golbma ohcci.

Antti Aikio
Vuoigatvuođadiehtaga magisttar, várrenotára Antti Aikio válljejuvvui Sámedikki láhkačállin. Govva: Laura Junka-Aikio

Sámedikki láhkačállin lea válljejuvvon Antti Aikio. Láhkačálli válljejuvvui Sámedikki dievasčoahkkimis odne disdaga. Virgái ledje golbma ohcci; vuoigatvuođadiehtaga magisttar, várrenotára Antti Aikio, vuoigatvuođadiehtaga magisttar Piia Nuorgam ja vuoigatvuođadiehtaga magisttar, várreduopmár Kalle Varis.

Sámediggi ságastalai láhkačálli válljemis gittauvssaid duohken man maŋŋá buot golbma ohcci evttohuvvojedje virgái, nappo de šattai jienasteapmi.

Asko Länsman evttohii Antti Aikio, Pentti Pieski evttohii Kalle Varis ja maŋimužžan Nilla Tapiola evttohii Piia Nuorgam.

Suollemas lihppojienasteamis addojuvvujedje 17 jiena main Antti Aikio oaččui logi (10), Kalle Varis golbma (3) ja Piia Nuorgam njeallje (4) jiena.

Sámedikki láhkačálli válmmaštallá sápmelaččaid vuoigatvuođaid guoski áššiid ja doaibmá Sámedikki hálddahusa áššemeannudeaddjin.

Varrasamosat: Sápmi

Váldoođđasat

Varrasamosat

Muualla Yle.fi:ssä