Sápmi

Anu Magga ollašuhtii koronadoarjagiin mobiilaapplikašuvnna, mainna sáhttá oahpásmuvvat earret eará boazodollui ja boazodálu historjái

Anu Magga, Jaakkolan porotilan emäntä syöttää porolle koivunlehtiä.
Fitnodatdoalli Anu Magga muitala, ahte dát lea leamašan vuosttaš geassi, go sin fitnodat leamašan rabas. – Go dilli stáđásmuvai ja áddiime, ahte mátkkošteapmi ruovtturiikkas álgá sihkkarit geasuhit, de álggiime ovddidit visot jođánit, muitala son. Govva: Emma Sarsila / Yle

Mobiilabálgá jođedettiin beassá gullat ja oaidnit muitalusa ovdamearkka boazoturismmas. Fitnodatdoalli Anu Magga dadjá Yle Lappi jearahallamis, ahte koronadoarjagiin sii baste fállat juoidá ođđa ruovtturiikka mátkkošteaddjiide.

Jaakkolan porotila dahjege Jaakkola boazodállu Luostos fidnii stáhta ruhtadanlágádus Business Finlandis dán giđa nu gohčoduvvon koronadoarjaga ja innovašuvdnaseđela. Fitnodat fidnii doarjaga mobiilaapplikašuvnna ovddideapmái. Dál dainna lea ollašuhtton nu gohčoduvvon mobiilabálggis.

Boazodálu šiljus leat govvatávvalat ja go vaikko telefovnnain lohká gova, beassá oaidnit ja gullat muitalusaid. Daid lea čállán ja plánen fitnodatdoalli, dálu eamit Anu Magga.

Korona bággii ovddidit geassebálvalusaid

Anu Magga muitala Yle Lappi jearahallamis, ahte koronadilli bággii sin ovddidit geassemátkkošteami bálvalusaid vuosttáš háve goassege. Ovdal fitnodat lea bálvalan dušše dálvet. Stuorámus oassi sin kundariin leamašan olgoriikkalaččat ja Magga leage vásihan, ahte suopmelaš mátkkošteaddjiide ii leat nu álki hutkat dakkár buktaga, man livčče álki oastit.

Vuosttaš háve jurdda buktagis šattaige juo olu ovdal, muhto korona dagahan dilis dan lei buorre áigi ollašuhttit.

Magga lohká, ahte dilli lei giđđat oalle doaivvuheapme, go doaibma bisánii oalát ja seammás maid ruđa boahtin nogai.

– Muhtin gaskkas orui, ahte geassi lea áibbas guorus, ahte mii golahit áiggi dušše bearrašiin karantenas ja mátkkošteaddjit eai jođe, son muitala.

– Go dilli stáđásmuvai ja áddiime, ahte mátkkošteapmi ruovtturiikkas álgá sihkkarit geasuhit, de álggiime ovddidit visot jođánit, Magga joatká.

Yrittäjä Anu Magga näyttää tabletilla, miten tilan mobiiliopas toimii
Dálu šiljus sáhttá gávdnat báikkiid, maidda gullá muitalus. Anu Magga čájeha, mo applikašuvdna doaibmá. Govva: Emma Sarsila / Yle

Applikašuvdna fállá muitalusaid nu gohčoduvvon mobiilabálgá alde

Jurdda mobiilaapplikašuvnnas ovdánii, go fitnodat háliidii hutkat suopmelaš kundariidda álkes, miellagiddevaš buktaga, man sáhttá maid álkit oastit.

– Álgen dutkat, mo earát leat dahkan ja dasto čállen giehtačállosiid muitalusain ja ovddidin daid plánaid. Dasto šat galggai dušše gávdnat fitnodaga, mii basttii ollašuhttit applikašuvnna, čilge Magga.

Magga ja su guoimmi fitnodat ozai Business Finlandis nu gohčoduvvon koronadoarjaga dahjege veahkkeruđa applikašuvnna plánemii ja digitálalaš márkanastimii. Veahkkeruđa doarjagiin mobiilaapplikašuvdna ollašuvai.

Applikašuvdna doaibmá nu, ahte guossi luđe dan juogo iežas telefovdnii dahje luoikkaha fitnodagas tableahta. Geavaheamis galgá máksit mávssu ja dainna beassá dasto oahpásmuvvat boazodálu historjái, go dan bokte bohtet videohámis iešguđetlágán muitalusat.

Ovtta bearraša bohcco gova bokte beassá gullat ja oaidnit videomuitalusa boazoturismma historjjás. Muitalusa loahpas vel Magga ja su nieida juoigaba.

Videoin Magga ieš muitala persovnnalaččat dálu historjjás: mii doppe lea dolin dáhpáhuvvan ja ovdamearkka dihte mo son šattai dálu eamidin.

Yrittäjä Anu Magga syöttää poroa Jaakkolan porotilalla
Anu Magga biepmá bohccos. Oktan fáddán mobiilaapplikašuvnnas lea boazodoallu ja ovdamearkka dihte boazojahki. Govva: Emma Sarsila / Yle

Doarjagat fitnodagaide spiehkastatdilis

Koronavirusa leavvan dagahii fitnodagaide váttes dili. Danin stáhta ruhtadanlágádus Business Finland lea mieđihan fitnodagaide nu gohčoduvvon koronadoarjagiid oktiibuot 490 078 150 euro ovddas, Lappi guovllus 26 686 218 euro ovddas. Doarjagat leat čujuhuvvon 12 502 sierra prošektii. Ohcamušat ledje 27 983.

Business Finlanda doarjagat leat dárkkuhuvvon namalassii doaimma ovddideapmái, go fas ovdamearkka dihte gielddaid mieđihan doarjjaruđat leat oaivvilduvvon fitnodatdoaimma almmolaš goluide.

Varrasamosat

Muualla Yle.fi:ssä