Sápmi |

ÁRA joavku ođđa musihka duohken dehálaš muitalus – oamasta skearru vieljjaidis muitun

Luohtejoavku ÁRA almmustahttá sin goalmmát skearrus Girkásit dán vahkoloahppa. Juoigi Simon Issát Marainen doaivu skearru leahkit dálkásin sámi álbmogii – sidjiide geain leat leamašan sevdnes jurdagat.

ÁRA joavku njunus Simon Issát Marainen fállá Girkásit-albuma dálkasin sámiide geain leat dahje leat leamašan sevdnes jurdagat
ÁRA goalmmát album "Girkásit" lea máŋggabealát skearru, man musihkamáilbmi lea hui iešlagan muhto dovddus ÁRA. Govva: Preassagovva

Gaskavahku 1.2. Ára joavkkus lei vuosttaš čuojaheapmi Göteborg filbmafestivála oktavuođas. Bearjadaga galgá Ára joavku de doallat Johkamohkis vuosttaš virggálaš konsearta sin goalmmát skearrus "Girkásit".

Jagis 2010 almmuhuvvui vuosttaš skearru ja nubbi skearru 2014. Seamma jagis de 2014 Simon massii guokte nuorát vieljja geat heavvanedje iešsoardimis jagi siste. 

ÁRA joavku goalmmát skearru Girkásit lea muitun ja dálkásin.
ÁRA joavku goalmmát skearru Girkásit Govva: preassagovva

– Dát lea sunno muitun dát skearru ja dat leat ollu bihtát mat leat dan fáttas, vieljjarohkkiid muitun, lohká Simon Issát Marainen. Sunnje lea skearru leamaš dehálaš muhto guhkes proseassa.

– Skearru námma lea Girkásit, mii galgá muitit boahtteáiggi oaidnit čuovgadin ja dáppe lea min olbmuid gáskka, min eallimis dáppe lea sadji juohke oktii, ahte ii galgga oktage dárbbát dovdat dego olgguštuvvon beare danin ahte go lea beare lossat ain muhtumin.

Iešsoardin ii leat čoavddus - "Eat mii oažžo vuollánit"

Simon Issát Marainen lea ieš gártán mannat čađa áiggiid maid ii oktage hálidivčče vásihit. Muhto Simonis lea doaivva leamaš olles áigge ja lea dan doaivva čatnán luohttái ja ođđa bihttáidde Ára skearrui.

– Juohke olbmos lea dakkár losibut áigi ja dan mii buohkát diehtit, muhto go fal beare nágodit boahtteáiggi čuovgadin oaidnit, gal dat de fas buorrána dilli ja mokta, nu ahte dat lea vieljjaid muitun dat skearru, muitala Marainen.

Simon Issát Marainen lea dál golbma jagi gieđahallan iežes vieljjaid iešsoardima ja dál su joavku Ára lea man bokte gaskkusta dovdduidis mas son doaivu leahkit dálkodeaddji váikkuhus.

– Mun anán dat lea hui dehálaš munnje maid muitalit. Ja dat lea danin, ahte dat lea maid dákkár hui buorre ovdamearka, ahte váikko olmmoš lea dego moráš dilis maid, don sáhtat soameslahkai dan morráša, dan dovddu dego bargagoahtit ja das oažžu juoidá buori bohtosa maid.

– Visot dákkár losses áššit eallimis, ahte jos beare nagoda nuppelahkai jurddášit, gal das boahta buorre. Ja gal dat mis boahta buorre eallin maid muhtumin, mii beare nagodit. Eat mii galgga vuollánit, dat dat lea maid hui dehálaš.  Eat mii oažžo vuollánit.

SImon Issát Marainen lea Vuolle Sohppára okta dovddumus juoigiin. Ovttas ÁRA joavkuin huksejit sii čáppa ráfálaš musihkamáilmmi.
Simon Issát Marainen lea bargan alcces geainnu čuovgga guvlui ja lohká alcces musihka dálkásin. Govva: Massa Media

Máŋga duogáža sámi nuoraid heajos dillái

Simon Marainen lea gullán ollu nuoraid ságaid ja oaidná, ahte ii leat okta sivva mánne leat dát váttisvuođat.

– Dat lea hui dehálaš dákkár áššiid birra maid ságastit, go mii diehtit ahte min sámiid gaskka lea veháš dákkár rašes dilli justa dien oktavuođas ahte dat leat ollu sámi nuorat geat eai veaje nu bures otne.

–  Dat leat maŋga duogáža dasa maid, muhto mii fertet duostat ságastit ja mahttit gaskaneaset ságastit dákkár áššiid birra maid, eat mii galgga beare vajalduhttit ja soames čihkii daid hoigat ja jaskat leahkit, Simon Issát joatká.        

Boahteáiggi galgá mahttit oaidnit čuovgadit

Simon Marainen lohká hui dehálaččan olbmuidda ságastit daid áššiid birra go oaidná dan vuohkin Sámi álbmogii dearvvásnuvvát iige oktage dárbbaš gillát dienna, ahte ollu iešsoardimat dáhpáhuvvet boahteáiggis ain.

Mun goit geahččalan čájehit, ahte doppe lea geaidnu boahtteáigái.

– Simon Issát Marainen

Leatgo don gullán dahje oaidnán dakkár reaidduid ja čovdosiid, mat addet vejolašvuođaid sámenuoraidde ohcalit veahki dahje hállat jos lea dárbu?

– Na mun jáhkán ahte okta deháleamus reaidu lea ahte mii álgit ságastit. Dat dat lea min dálkkás maid mun jáhkan mii lokte ovdii dákkár áššiid. Dat lea dieđusge nu ahte ahte dat lea hui losses ášši dákkáriid birra ságastit muhto ii dat ábut, mii ferte váldit ja álgit dáinna bargat nu ahte mii nágodit ain boahtteáiggi oaidnit čuovgadin, eatge dárbboš dáinna gillát.

"Lean šaddan bágget iežan maid ságastit dáid áššiid birra"

Vaikko moraš leage váikkuhan olu Simon Issáha eallimii, son dovdá, ahte losses dáhpáhusain ferte maiddái ságastallat.

– Dieđusge ná go mun maid lean bággen iežan ságastit, nu dat lei álggus ahte mu lean šaddan bágget iežan maid ságastit dáid áššiid birra. De mun vásihan, ahte erenomážit ollu nuorát geat mu lusa bohtet ja ságastit daid áššiid birrá ja muitalit ahte sis maid lea leamašan, dovdán justa dan seamma dego mu vieljjaguktuin dovddaigga, váikko ii leat mannán nu guhkas ahte livččii iežes heakka valdán, muitala Marainen.

Simon Issát Marainen doaivu, ahte sin joavkku ođđa skearru doaimmašii dálkásin olles sámi álbmogii ja ereanomažit sidjiide geain leat leamašan sevdnes jurdagat. Son háliida veahkehit musihkainnis earáid.

– Dat leat goit ollusat geat bohtet muinna maid ságastit ja muitalit mán lossat sis lea leamaš ja mun jáhkan ahte dákkár skearru maid mii dál leat almmustahttán, ahte dat sahttá danin leahkit dálkkás. Mun goit geahččalan čájehit, ahte doppe lea geaidnu boahtteáigái.

Skearru máŋŋonii, muhto vurdet jo geasi

Iešalddes skearru galggai joavkku plánaid mielde almmustuvvot jo čakčat, muhto iešguđetge vahágiid bokte skearru máŋŋonii.

Dat ii eastán ÁRA vuolgimis čakčat release-turneai.

– Mii leat johtán ođđa musihkain, vaikko ieš dat skearru ii válbmánan, muhto dál mis eai leat nu hirbmat stuorra plánat. Dál mii gal beare vuordit,ahte beassá ollu čuojahit dán geasi, lohká Simon.

Guovvámánu 14. beaivve galgá Ára Polandii čuojahit, maŋŋel Johkamohki márkániid almmustahttinkonseartta, man Marainen ieš atná alla árvvus.

– Dat lea dieđusge gutni dohko beassat ovdanbuktit iežes musihka ja čájehit sámivuođa, dat šaddá somá, illuda Simon.

Girkásit -skearru lea fitnemis Itunesas go maiddái Spotify:as. Simon Marainen lohkká ahte lea leamaš váttis gávdnat ovdal ÁRA Spotify:s, muhto ášši galggašii leat dál ordnegis.  

Simon Issát Marainen jearahallan lei duorastaga 2.2.2017 Sohkaršohkka -prográmmas. Guldal dás olles jearahallama.

Varrasamosat: Sápmi

Váldoođđasat

Varrasamosat

Muualla Yle.fi:ssä