Sápmi |

Arctic Spirit -konferánsa álgá odne Roavvenjárggas – Suopma váldá badjelasas Barentsráđi ságadoallivuođa

Arctic Spirit -konferánssa teman lea earret eará árktalaš dorvvolašvuohta sihke Eurohpá ja árktalaš guovllu ovttasbargu Barents guovlluin. Maiddái sámit leat mielde sáhkavuoruin ja panelaságastallamiin.

Kulttuuritalo Korundi Rovaniemellä.
Arctivc Spirit -konferánsa lea kulturviessu Korundis Roavvenjárggas. Govva: Sara Kelemeny / Yle

Arctic Spirit -konferánsa álgá odne Roavvenjárggas. Dán jagi temán lea: Oktasaš Árktis vai nággobohcciidahtti guovlu. Perspektiivvat vejolašvuođain ja hástalusain Barents ja Arktalašguovllu ovttasbarggus.

Suopma váldá badjelasás Barentsráđi ságadoallibarggu Arctic spirit -konferánssas ja olgoáššiidministtar Pekka Haavisto ovdanbuktá odne ságadoallibaji prográmma. Guovddážis lea maid árktalaš dorvvolašvuohta sihke Eurohpá ja árktalaš guovllu ovttasbargu Barents guovlluin.

Guokte beaivvi bisti konferánssa prográmmas leat earret eará sáhkavuorut, dearvvuođat ja panelaságastallamat.

Maiddái sámit leat mielde dán konferánssas. Suoma sámedikki ságadoalli Tuomas Aslak Juuso doallá konferánssas sáhkavuoru ja buktá sámedikki dearvvuođaid. Son maid oassálastá panelaságastallamii, gos ságastallet earret eará EU árktalaš geavadagaid birra Suoma geahččanguovllus. Elle Merethe Omma Sámiráđis lea mielde ságastallame das, maid árktalaš álbmogat sáhttet vuordit EU:s boahttevaš jagiin. Panelisttat maid gieđahallet vejolaš čuolmmaid, main EU galgá váldit stuorát rolla.

Yle Sámi doaimmaheaddji Sara Kelemeny lea báikki alde Roavvenjárggas ja odne Yle Sámi rádio- ja tv-prográmmain ja neahtasiidduin beassá gullat, oaidnit ja lohkat eanet konferánssa birra.

Olles prográmma beasat geahččat dáppe.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä