Sápmi |

Árktalaš guovllu álgoálbmotnuorain leat oktasaš fuolat ja váttisvuođat – “Lea dehálaš oažžut oktavuođa earáide”

Eanemus nuoraid miela deddet dálkkádatrievdan, iešsoardimat ja mielladearvvašvuođaváttisvuođat.

Enni Similä
Suoma Sámi Nuorat -searvvi várreságadoalli Enni Similä mielas lea dehálaš, ahte árktalaš guovllu álgoálbmot nuorat barget ovttas. Govva: Kirsti Helena Länsman / Yle

Árktalaš guovllu álgoálbmotnuorat leat čoahkkanan vuosttaš geardde Arctic Youth Leaders´ Summit -deaivvadeapmái. Deaivvadeapmi lea oassi árktalaš álgoálbmogiid Arctic Leaders’ Summit -dáhpáhusas, mii ordnejuvvo dán vahkkus Roavenjárggas.

Álgoálbmot nuoraid deaivvadeamis leat mielde oktiibuot 30 nuora Sámis, Ruoššas, Alaskas, Ruonáeatnamis ja Kanadas.

Suoma Sámi Nuorat -searvvi várreságadoalli Enni Similä muitala, ahte deaivvadeamis sii leat beassan ságastallat árktalaš guovlluid nuoraid hástalusain ja árgabeaivvis.

– Mis leat oalle seammalágan hástalusat. Oalle olu mii leat háleštan mielladearvvašvuođaváttisvuođain, mat gávdnojit juohke guovllus. Nuoraid gaskkas lea olu šlundivuohta ja maiddái iešsoardimat. Dat váikkuhit boahttevuhtii ja skuvlejupmái, oaivvilda Similä.

Nuorat Arctic Leaders' Youth Summit
Nuorat miehtá árktalaš guovllu ledje čoahkkanan maŋŋebárgga bargobájiide. Govva: Kirsti Helena Länsman / Yle

”Seammalágan váttisvuođat, seammalágan čovdosat”

Guovttebeaivásaš Arctic Youth Leaders´ Summit -deaivvadeamis nuorat leat ordnen bargobájiid, gos leat beassan suokkardallat dan, maid nuorat ieža sáhtášedje bargat buoret boahtteáiggi ovdii.

Suoma Sámi Nuorat -searvvi ovddasteaddjiid Enni Similä ja Anni-Sofia Niittyvuopio mielas lea dehálaš čatnat oktavuođaid eará árktalaš guovllu nuoraide.

– Mii leat dat boahttevuođa bargit. Lea dehálaš oažžut oktavuođa earáide, dadjá Niittyvuopio.

Niittyvuopio jáhkká, ahte eallinvuogit ovttastahttet árktalaš guovllu nuoraid, muhto vel eanet nuoraid čatná oktii ballu dálkkádatrievdama dagahan váttisvuođain.

Suoma Sámi nuorat -searvvi Juhán-Tuommá Magga mielas lea buorre, go árktalaš nuorat leat álggahan ovttasbarggu.

– Mis leat seammalágan váttisvuođat, muhto maiddái seammalágan čovdosatge. Mis lea olu maid addit ja oahppat guđet guoimmis. Guhkesáigásaš ovttasbargguin mii beassat buot buoremusat ovddos guvlui, oaivvilda Magga.

Nuorat Arctic Leaders' Youth Summit
Eanemus nuoraid miela deddet dálkkádatrievdan, iešsoardimat ja mielladearvvašvuođaváttisvuođat. Govva: Kirsti Helena Länsman / Yle

Árktalaš álgoálbmot njunnošat čoahkis

Árktalaš nuorat bukte ovdan iežaset deaivvadeami deháleamos bohtosiid ja gáibádusaid sáhkavuorustis Arctic Leaders´ Summit -rahpamis gaskavahkko.

Arctic Leaders’ Summit lea árktalaš álgoálbmogiid jođiheaddjiid alladási čoahkkaneapmi, man dán háve jođiha Sámiráđđi. Dál guđát háve ordnejuvvon dáhpáhussii vurdet badjel 80 árktalaš guovllu njunušolbmo.

Sápmelaččaid beales čoahkkaneapmái oassálastet ovddasteaddjit earret eará Sámiráđis, Suoma ja Norgga Sámedikkis, Sámi allaskuvllas, Máilmmi Boazoálbmogiid Searvvis ja Ovttastuvvan Našuvnnaid orgánain.

Suoma Sámi Nuorat -searvvi várreságadoalli Enni Similä illuda, go nuorat leat beassan dán jagi oassin dáhpáhusas.

– Dieđusge mii sávvat, ahte dat joatkašuvvá. Go Arctic Leaders´ Summit čuovvovaš háve lágiduvvo, de sávvamis dalle maiddái livččii nuoraid deaivvadeapmi, dadjá Similä.

Similä mielas deaivvadeapmi lea hui buorre vejolašvuohta čatnat oktavuođaid badjel riika rájáid.

– Sávan, ahte dát addá juohkehažžii vejolašvuođa maiddái gulahallat boahtteáiggis, ahte dat ii báze dušše dása, smiehtada Similä.

Varrasamosat: Sápmi

Váldoođđasat

Varrasamosat

Muualla Yle.fi:ssä