Sápmi |

Árktalaš guovlluid eamiálbmotnuoraid válbmejedje mearrideaddjin – Sámiráđi ja ICC skuvlejupmi nogai

Sámiráđđi lea ovttas ICC Greenlandin skuvlen sámi- ja inuihtanuoraide politihkalaš váikkuheami dáidduid. Golmma jagi skuvlen nogai dán giđa.

Árktalašguovllu eamiálbmot nuorat
Govva: Sámiráđđi

Guhtta eamiálbmotnuora oassálastte fidnui, mas sii ohppe politihkalaš váikkuheami dáidduid. Fidnus nuorat leat oassálastán sierra čoahkkimiidda ja áššedovdiid logaldallamiidda árktalaš guovlluin.

Nuorat leat čoahkkanan Nuuk-gávpogis Ruonáeatnamis nappo Kalaallit Nunaatis, Anáris ja Levis. Skuvlejupmi loahpahuvvui Ovttastuvvon Nášuvnnaid bissovaš foruma čoahkkimis New Yorkas.

Fidnu duogábealde leat Ruonáeatnama inuihttaorganisašuvdna ICC Greenland ja Sámiráđđi. Fidnu ruhtađii Davviriikkaid ministerráđđi.

Skuvlejupmi ii gárve njuolga virgái – "Alddis galgá leat beroštupmi dasa"

Eanodatlaš Rosa-Máren Magga lei okta sis, guhte lei fidnus mielde (Olgoministeriija). Sii leat skuvlejumi bokte oahpásmuvvan Árktalaš ráđi ja ON doaimmaide. Sii leat gieđahallan inuihtaid ja sámiid hástalusaid ja politihkálaš dili, sihke eanangeavaheami ja kultuvrii guoskevaš áššiid, muitala Magga.

Sutnje skuvlejupmi leamaš ávkkálaš.

– Mii leat oahppan mo galgá váikkuhit, makkár váikkuhanvejolašvuođat leat, sihke mo galgá doaibmat ja maiddái diplomatiija vugiid.

Magga muitala, ahte lea beroštuvvan bargat riikkaidgaskasaš birrasis.

– Mu niehkun livčče geavahit dan máhtu ja dáiddu dakkár barggus, mas mun beasašin áššedovdin doaibmat, čilge Magga.

Rosa-Máren Magga
Rosa-Máren Magga ja eará skuvlejumi nuorat leat oahppan earet eará politihkalaš váikkuhanvugiid. Govva: Sámiráđđi

Dan skuvlejumi bokte ii njuolga gárvvásmuva dihto virgái dahje oaččo bargosaji, iige das ožžon bálkká iige oahppočuoggáid.

Magga lohkáge, ahte dan skuvlejupmái galgá leat alddis beroštupmi. Son lea ieš sáhttán geavahit dan ávkkin iežas stuđeremiin.

– Dat lea buorre lassi. Lean gal hui giitevaš, ahte lean ožžon leat dás mielde ja ahte Sámiráđđi lea addán dakkár vejolašvuođa midjiide, lohká Rosa-Máren Magga.

Skuvlejumi boahtte áigi eahpesihkkar

Skuvlejupmi nogai cuoŋománus ON bistevaš forumii. Sámiráđi valdočálli Áile Javo muitala, ahte skuvlema joatkka ii leat sihkkar, daningo eai leat vel ohcan ruhtadeami.

– Muhto livčče gal buorre jus dat joatkašuvašii. Mii áigut háleštit ICC ovddasteddjiiguin joatkaga birra, muitala Javo.

Sámeráđi presideanta Áile Jávo
Áile Javo mielde Sámiráđi ulbmilin lea rekryteret nuoraid mielde sin doaimmaide. Govva: Dan Robert Larsen / NRK

Jus dat skuvlejupmi ii joatkašuva, de Sámiráđđi áigu lihkká joatkit nuoraid rekryterema Sámiráđđái.

– Eat vel dieđe sihkkarit, mo mii dan bargat, muhto ovdamearka dihte sáhttit váldit nuoraid mielde čoahkkimiidda ja nu ain.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä