Sápmi |

Árktalaš hábmema eallinbargobálkkašupmi Mihku Ilmárii ja Mihku Biehtárii

Eallinbargobálkkašumi mieđihuvvui vieljažagaide árktalaš hábmema temávahku, Arctic Design Week, olis.

Veljekset Petteri (vas.) ja Ilmari Laiti saivat Arctic Design Weekin elämäntyöpalkinnon.
Vieljažagat Mihku Biehtár ja Mihku Ilmár válddiiga bálkkásumi vuostá gáiddusdilálašvuođas gaskavahku 24.3.2021. Govva: Vesa Toppari / Yle

Sámedáidaga gudnedoavttir, silbaduojár Mihku Biehtárii, Petteri Laitii ja duojár, lektor Mihku Ilmárii, Ilmari Laitii lea mieđihuvvon Árktalaš hábmema eallinbargu -bálkkašupmi.

Bálkkašupmi mieđihuvvui Arctic Design Week -dáhpáhusa bálkkašandilálašvuođas odne gaskavahku. Roavenjárgga gávpoga dieđáhusas muitalit, ahte dábálaččat bálkkašumi fidne ovttaskas olmmoš, muhto dán háve sii háliidedje addit bálkkašumi spiehkastatlaččat guovtti olbmui.

Vieljažagat Petteri ja Ilmari Laiti leaba bargan guhkes karrieara sámeduoji ealáskahttimiin ja ođasmahttimiin, ja sirdán oahpaheaddjin árbevirolaš dáidduid čuovvovaš buolvvaide.

Bargovuohkin geavahit árktalaš materiálaid jierpmálaččat

Mihku Biehtár, Petteri Laiti lea dovddus duojár. Jagis 2019 son nammaduvvui Lappi universitehta gudnedoavttirin.

Son lea duddjon sihke árbevirolaš sámedujiid ja dáiddadujiid čoarvvis, náhkis, báhkis ja silbbas ja gollis. Sus leat duojit máŋggain museain ja su duojit leat johtán maiddái máŋggain čájáhusain iešguđet guovlluin Suomas, Davviriikkain ja miehtá máilmmi.

Petteri Laiti esittelee Arctic Design Weekin elämätyöpalkintoa.
Mihku Biehtár čájeha bálkkašumi, man soai gaskavahku 24.3.2021 oaččuiga. Govva: Vesa Toppari / Yle

Mihku Biehtár dadjá, ahte lea mearkkašahtti oažžut fuomášumi oppa eallima bistán karriearas. Bálkkašupmi movttiidahttá ártegis máilmmidilis.

– Dát munnoge barguhan gullá dakkár arktalaš dáiddasuorgái, ahte mo geavahit dan árktalaš guovllu materiálaid jierpmálaččat, muitala Mihku Biehtár.

Mihku Biehtár ja eallinbargobálkkašupmi Jietna: Linda Tammela / Yle

"Jus muhtinge oahppá, dat lea olu ovddosguvlui"

Duojár, dáiddaduojár ja oahpaheaddji Mihku Ilmár, Ilmari Laiti oaččui vielljas láhkái soga árbin sámeduoji máhtu. Mihku Ilmár lea bargan guhkes karrieara Sámi oahpahusguovddáža sámi duoji lektorin, skuvlejumi jođiheaddjin ja várrerektorin.

Saamelaiskäsityön pioneeri Ilmari Laiti
Mihku Ilmár lea duđavaš dasa, mo eallinbargu fuomášuvvo. Govva: Vesa Toppari / Yle

Mihku Ilmár lea háliidan sirdit duodjemáhtu ain ovddosguvlui ja danin bijai Sámi oahpahusguovddáža álgui. Roavenjárggas son lei fuobmán, ahte doppe oahpahedje duddjot ártegis giehtadujiid, mat muittuhedje sámi dujiid. Son álggii dutkat duoji jođedettiin miehtá Sámi ja áddii, ahte dat sámeduodjihan lea dat, maid sii ledje ruovttus Guolnnás oppa áigge bargan.

– Ledjen dan oaivilis, ahte jus muhtinge vázzá ja oahppá daid sámedujiid, de dat lea juo olu ovddosguvlui, muittaša Laiti.

Sutnje mieđihuvvui dán jagi álggus Suoma kulturruhtaráju Tapio Wirkkala ruhtarájus veahkkeruhta ohcamuša haga, dasgo son lea seailluhan ja ovddidan sámi duodjeárbbi.

Mihku Ilmár ja eallinbargobálkkašupmi Jietna: Linda Tammela / Yle

Anára duojáriid neahttagávpái maid bálkkašupmi

Arctic Design Week ordnejuvvo Roavenjárggas jahkásaččat ja dat bálkkaša iešguđet hábmensuorggi doibmiid ja studeanttaid.

Álbmotjienasteami boađusin Jagi 2021 árktalaš hábmenintensiivvalaš fitnodahkan válljejuvvui Inarin Käsityöpuoti (sá. Anára duodjegávpi). Dat oaččui 46 proseantta jietnasállaša.

Beaiváduvvon 25.3.2021 dii. 9.58: Lasihuvvon varas govat Mihku Ilmáris ja Mihku Biehtáris.

Varrasamosat: Sápmi

Váldoođđasat

Varrasamosat

Muualla Yle.fi:ssä