Sápmi |

Árktalaš olgoministarat eai vuolláičállán Roavvenjárgga julggaštusa – sivvan sierraoaivilvuohta dálkkádatnuppástusas

Árktalaš ráđi olgoministarat vuolláičálle Roavvenjárggas spiehkastahkan ministtarcealkámuša.

Mike Pompeo ja Timo Soini
USA olgoministtar Mike Pompeo ja Suoma olgoministtar Timo Soini Árktalaš ráđi čoahkkimis Roavvenjárggas 6.5.2019. Govva: Jouni Porsanger / Suoma olgoministeriija

Roavvenjárgga árktalaš riikkaid olgoministtarčoahkkima dehálamos boađus galggai leat Roavvenjárgga deklarašuvdna dahjege julggaštus, mii galggai čujuhit luotta Islándda ságadoallibadjái Árktalaš ráđis. Julggaštusa eai goittotge vuolláičállán, danin go USA, Ruošša ja eará oasseváldit eai lean ovttaoaivilis dálkkádatnuppástusas.

– USA bázii dálkkádatnuppástusa vuosttildeamis okto ja earát vásihedje, ahte eai sáhte dahkat duššin cealkagiid, mat laktásit dálkkádatnuppástussii, dadjá Árktalaš guovddáža jođiheaddji Timo Koivurova.

Roavvenjárgga deklarašuvnna sadjái ministarat vuolláičálle ministtarcealkámuša Roavvenjárgga čoahkkimis. Das čuožžu ovdamearkka dihtii, ahte eanetlohku Árktalaš ráđi lahttoriikkain atná dálkkádatnuppástusa stuorámus hástalussan árktalaš guvlui ja deattuha jođánis doaimmaid ášši hárrái.

Dasa lassin Suopma olggosattii iežas cealkámuša Roavvenjárgga čoahkkimis olgoministtar Timo Soini namas.

Vuosttas geardi go eai dohkkehan deklarašuvnna

Árktalaš ráđi bargun lea ovddidit árktalaš stáhtaid ja eamiálbmogiid ovttasbarggu erenoamážit birassuodjaleames ja bistevaš ovdánumi gažaldagain. Dat lea doaibman jagi 1996 rájes.

Dát lea vuosttas geardi Árktalaš ráđi historjjás, go ministarat eai dohkkehan deklarašuvnna ráđi doaibmabaji loahpas.

Suoma guovttejahkásaš ságadoallibadji Árktalaš ráđis nogai maŋŋebárgga Árktalaš ráđi olgoministariid čoahkkimii. Dál ráđi jođihišgoahtá Islánda.

Árktalaš ráđđái gullet viđa Davviriikka lassin Kanada, USA ja Ruošša.

Varrasamosat: Sápmi

Váldoođđasat

Varrasamosat

Muualla Yle.fi:ssä