Sápmi

Árktalaš Sápmi deaivá Ásia liekkasvuođa – Kaija Paltto vuolgá duhppendujiidisguin Leammis Thaieatnamii

Kaija Palton huovutustaidetta Lemmenjoelta.
Kaija Paltto dáidagis oidno sámiid dološ symbolat ja Sámi jagiáiggiid ivnnit. Govva: Aslak Paltto / Yle

Kaija Paltto duhppendáidda lea oaidninláhkái ođđajagimánu 9.-20. beivviid Phuket-gávpogis, Thaieatnamis.

Dáiddár Kaija Paltto jagi molsašupmi lea leamašan gelddolaš. Paltto ruovttus Leammis son lea páhkkegoahtán iežas duhppendáidaga kássaide ja mátkelávkkaide, go lagaš beivviid son johtá Phuketii, Thaieatnamii.

Paltto duojit ja dáidda leat johtán juo oktiibuot logi sierra riikkas jagiid áigge. Jahki dassái Helssega mátkemeassuin Paltto bovdejuvvui dujiidisguin nuppe beallái máilmmi.

– In leat dienasmielain dohko vuolgimin, muhto mu mielas dat lea nu gelddolaš ja dat lea nu somá deaivat ođđa olbmuid doppe ja oažžut ođđa oktavuođaid. Dat lea maid garra bargu, muhto dan maŋŋá lea hui somá boahtit ruoktot, illuda Kaija Paltto.

Kaija Palton huovutustaidetta Lemmenjoelta.
Dáiddár Kaija Paltto duhppendáidda lea johtán birra máilmmi jagiid áigge. Govva: Kaija Paltto

Su duhppendáidda lea oaidninláhkái "Spirit of Homeland" -čájáhusas ovttas báikkálaš govvadáiddár Boomkasem Kowsantiin. Dál lea áigi páhkket ja juo jagi nuppi vahkus ávvudit rahpandoaluid.

Paltto vuordá illumielain dan, ahte guokte sierralágan máilmmi, árktalaš Sápmi ja liegga Thaieanan deivet nuppiideaset.

– Son lea govvadáiddár, ahte lea erenomáš, go lea áibbas earálágan dáidda go mus. Mu duodji lea eanet tekstiila. Dat lea áibbas sierralágan máilbmi, smiehtada Paltto.

Thaieanan lea hui bivnnut luopmobáiki dál ođđajagimánus. Paltto diehtáge juo, ahte moadde oahpes olbmo lea searvamen maiddái čájáhusa rahpamii.

– Doppe lea dál dat buot bivnnuhamos sesoŋŋa ja dál justa olbmot leat mátkkošteamen dohko Suomas ja davviriikkain.

Ovdal mátkki Paltto lea geargan vuoiŋŋastit ja ráfot juovllaid áigge. Thaieatnama mátkki maŋŋel de lea vuordimis mátkkálaččaid galledeamit su ateljés Leammis Anár gielddas.

De mátkkošteaddjit Ásias bohtetge finadit su ruovttučájáhusas Leammis, gasku galbma Sámi.

Varrasamosat

Muualla Yle.fi:ssä