Sápmi |

Artisteh pyehtih spiekâstahtiileest orniđ nettikonsertijd – “Tot lii nuuvt älkkee, tuše čokkáđ pääihist teikkâ ustev kulen”

Elle Kokkonen já Heli Aikio kalendereh láá kuáruseh. Nettikonserteh išedeh, ko ij lah máhđulâš toollâđ táválijd konsertijd.

Elle Kokkonen
Elle Kokkonen lávlu já čuojât Njihe-juávhust. Suu mielâst nettikonsertij toollâm lii älkkee, čuojâttiđ puáhtá kost peri haalijd. Govva: Elle Kokkonen / priivaat kove

Konserteh, lávlumkištoh já tábáhtusah iä uárnejuu tääl koronavirus tiet.

Artistij kalendereh láá kuáruseh, mutâ káidusohtâvuođah pyehtih išediđ meid artistij eellim. Artisteh pyehtih toollâđ káidusohtâvuođâi peht livekonsertijd.

Elle Kokkonen lávlu já čuojât Njihe-juávhust. Sun lii laaviim jotteeđ konsertijn suullân kuohtii mánuppaajeest, mutâ tääl koronavirus keežild, sun lii álgám toollâđ nettikonsertijd.

Sun lii kuohtii jo toollâm konsert Facebook peht.

– Kalehân tot lii muu mielâst suotâs, mutâ ij tot lah aaibâs siämmáš, ko taggaar livetilálášvuotâ, Kokkonen muštâl.

Suu mielâst nettikonsertij toollâm lii älkkee, čuojâttiđ puáhtá kost peri haalijd.

– Tot pištá suullân tijme, ađai tot lii váhá kuhheeb ko táváláš konsert. Tot lii nuuvt älkkee, tuše čokkáđ pääihist teikkâ ustev kulen, sun povvust.

“Artist tááhust lii kal suotâs, ete ij taarbâš nuuvt ennuv jotteeđ”

Nettikonsertijd puáhtá kuvviđ puhelimáin teikkâ tiäturáin. Tehálumos lii tot, ete jienâ já kove puátih siämmáá ääigi. Nettikonsert várás tarbâšuvvoo-uv šiev nettiohtâvuotâ, vâi konsert luhostuvá.

– Kale mun oskom, ete Säämist jyehi kylást lii taggaar ohtâvuotâ, ete luhostuvá, Kokkonen iätá.

Kokkonen kuittâg ahevuš livekonsertijd, veikkâ nettikonsertijn láá-uv meid pyereh peleh, odâmerkkân tot, ete uážžu uáđđiđ pääihist.

– Kale mun taid ahevušâm, mutâ artist tááhust lii kal suotâs, ete ij taarbâš nuuvt ennuv jotteeđ, ige uáđđiđ kost peri, sun povvust.

Lii jurdâččâm ordniđ nettikonsert, mutâ vistig kalga selvâttiđ motomijd aašijd

Lávloo já livđoo Heli Aikio lii čuávvum nettikonsertijd pääihist já lii jieš-uv jurdâččâm orniđ taggaar.

– Tääl lii tiäđust-uv tot pyeri peeli tast, ete ko ij peesâ kuussân, te láá puáttám tagareh livestreamih. Lam kavnâm uđđâ artistijd, Aikio muštâl.

Heli Aikio
Heli Aikio lii uáppee Säämi muusikakademiast já tääl sust lii-uv asto porgâđ škovlâpargoid pääihist. Govva: Heli Aikio
Aikio lii jieš-uv jurdâččâm ordniđ nettikonsert, mutâ vistig kalga selvâttiđ motomijd aašijd.

– Mun lam smiettâm já hundâruššâm tom já sáttá leđe, ete mun tieggáár toolâm. Kalga val váhá selvâttiđ tom, ete taarbâš-uv toos ovdâmerkkân luuvijd, sun hundâruš.

Mietâ maailm artisteh láá álgám toollâđ nettikonsertijd. Meid Säämist láá tagareh puátimin jo taan ohhoost.

Luuvâ tääbbin pessijâškonsertist mon säämi aavis uárnee neetist.

Kuldâl Heli Aikio sahhiittâllâm tast.

Kuldâl Elle Kokkosii sahhiittâllâm tast.

Varrasamosat: Sápmi

Váldoođđasat

Varrasamosat

Muualla Yle.fi:ssä