Sápmi |

Aslak Holmberg: In jáhke, ahte eanan- ja meahccedoalloministerijas bisánit smiehttat

Cealkináigi ođđa Deanu soahpamušhápmosis nogai mannan bearjadaga. Soahpamušhápmosis bohte 39 cealkámuša. Ohcejohkalaš Aslak Holmberg lea okta dain, guhte dagai cealkámuša Deanu guolástansoahpamušhápmosis.

Sámediggi 21.06.2016
Ohcejohkalaš Aslak HJolmberg lei okta dain, guhte guđii cealkámuša Deanu guolástansoahpamušhápmosis. Govva: Ville Fofonoff / Yle

Cealkináigi ođđa Deanu soahpamušhápmosis nogai mannan bearjadaga. Ohcejohkalaš Aslak Holmberg lea okta dain, guhte dagai cealkámuša Deanu guolástansoahpamušhápmosis.

"Soahpamuššii ii leat báikkálaš doarjja"

Aslak Holmberg ákkastallá cealkámuša ovdamearkka dihte dainna, ahte báikkálaččat leat soahpamuševttohusa vuostá.

– Mu mielas váldoprinsihpa lea dat, ahte buot báikkálaš áirasat leat dain ráđđádallamiin leamašan ođđa evttohusa vuostá. Dat čielgasit muitala, ahte soahpamuššii ii leat báikkálaš doarjja. Dan leat viggamen eará guovllu olbmot, Mátta-Suoma olbmot ja Mátta-Norgga olbmot vuodjit čađa, vaikko báikki olbmot leat nannosit vuostá. Dat jo mu mielas lea dakkár sivva, ahte dan galggašii bissehit dalán, Holmberg kommentere Yle Sápmái.

– Ja dieđusge dathan čuohcá garrasamosit árbevirolaš bivdiide, namalassii sámi vuoigatvuođaide. Ja oainnán, ahte dat leat váldimin eret Deanuleagi sámiid návccaid birget dáppe, go dat leat váldimin nu stuorra oasi bivdorievttis eret, dadjá Holmberg.

"In jáhke, ahte lohket mu sániid ja bisánit smiehttat"

Holmberg ii jáhke, ahte justa su celkámuš boađášii rievdadit maidege. Son goittotge čálii cealkámuša, vai leat eanet jienat vuostálastimin soahpámuša.

– In mun jáhke, ahte eanan- ja meahccedoalloministerijas lohket daid mu garra sániid ja bisánit smiehttat, ahte dál mii leatge meaddán ja mii geassit dan eret. In mun jáhke dat aiddo nie boahtá mannat. Muhto goittotge go jo bivde cealkámušaid das, nu dal čálistin diekkár nana oaivila, vai lea joba okta jietna lasi dan koaras mii dan vuostálastá.

– Mun jáhkán doppe lea oalle látna dat cealkámušat iešguđet doibmii ja gii dan vuoiga diehtá, man vuđolaččat dat daidda vudjot. Eai mus gal nu stuorra vuordámušat leat, ahte juste dát cealkámuš boahtá rievdadit maidege.

Aslak Holmberg árvala, ahte su cealkámušas lea álkit oaidnit su oaiviliid, go dat ii leat nu formála cealkámuš.

– Dat mu cealkámuš ii leat nu hirbmat virggálaččat ákkastallojuvvon. Dat lea eanetge dienu árgabeaivválaččat ákkastallojuvvon, ahte dat lea eanet ii-formála. Dien láhkai soaitá álkkit dan lohkat ja oaidnit dieid oaiviliid.

"Ii imaš, ahte sállaša mearri geahppánan"

Holmberg čállá cealkámušastis maiddái, ahte ráddjehusa dárbu meroštallojuvvo eanáš sállaša vuođul.

– Maŋimus 30 jagi áigge fierbmebivdit leat geahppánan badjel 70 proseantta ja mearri stuorru ain. Holmberga mielas ii leat imaš, ahte sállaša mearri lea geahppánan, go stuorámus oassi bivdiin lea báhcán gáddái, čállá Holmberg cealkámušastis.

Holmberg lea vuollaičállán cealkámušas sámedikki kulturlávdegotti ságadoallin, sámedikkeáirasin ja luossabivdin. Vaikko Holmberg lea vuollaičállán cealkamuša kulturlávdegotti ságadoallin, son lea dahkan cealkámuša ovttaskas politihkarin, iige cealkámuš leat mannan kulturlávdegotti čađa.

Eanan- ja meahccedoalloministeriijai bohte 12.8. rádjái 39 cealkámuša Deanu soahpamušhápmosis.

Varrasamosat: Sápmi

Váldoođđasat

Varrasamosat

Muualla Yle.fi:ssä