Sápmi

Austrália meahccebuollimiin gillán eallit ožžot veahki nuppe bealde máilmmi Eanodagas

Minna Näkkäläjärvi
Minna Näkkäläjärvi šattai printet minstariid, ovdalgo beasai goarrut seahkažiid. Govva: Anni-Saara Paltto / Yle

Meahccebuollimiid geažil máŋggat ealličivggat leat báhcán oarbbisin. Dál olbmot leat goarrugoahtán daidda suodjeseahkažiid.

Heahttálaš Minna Näkkäläjärvi goarrunmašiidna jurrá dávjá dalle go gávttit ja eará árbevirolaš duojit galget gárvánit lagamuččaide. Dán mánus Näkkäläjärvi lea goit gorron juoidá Austrália elliide, máilmmi nuppe beallái.

Austrália lea gillán historjjás vearrámus ja viidáseamos meahccebuollimiin maŋimuš mánotbajiid. Buollimat leamašan stuorra roassun eandalitge elliide. Máŋggatlogit luonddusuodjalanguovllut leat buollán gutnan. Seammás dolla lea jávistan elliid eallinguovlluid ja dál máŋggat šlájat leatge áitaga vuolde jávkat oalát.

Olbmot birra máilmmi leat oaidnán mediaid bokte Austrália meahccebuollimiid dagahan vahágiid ja leat háliidan veahkehit.

– Oidnen, ahte Facebookas lei vuođđuduvvon dakkár joavku, mii goarru Austrália gáddjojuvvon elliide suodjepussežiid. Dat eallit, mat leat buollimiin gáddjojuvvon, de dat ožžot dakkár pussiid. Doppe lei stuorra dárbu oažžut lasi daid suodjepussiid ja mun jurddašin, ahte gal mun sáhtán goarrut, muitala Minna Näkkäläjärvi.

australia pusset
Minna Näkkäläjärvi goarui bores gávnniin 20 suodjeseahkaža Austrália elliid várás. Govva: Minna Näkkäläjärvi

Oarbbes čivggat sturrot suodjeseahkažiid siste

Näkkäläjärvi oaččui "Suomen käsityöläiset Australian eläimien avuksi" -Facebook-joavkkus buriid rávvagiid ja minstariid ja goarrugođii boares gávnniin seahkažiid. Moatti beaivvis gárvánedje oktiibuot 20 suodjeseahkaža ja dat galget sáddejuvvot viidáset Austráliai vel dán mánu loahpas.

– Stuorimus oassi dáin seahkain manná keŋguru, sohkaroarri, opossumi ja wallabi čivggaide. Dieđán, ahte dat dárbbašit suoji ja dan seahkaža.

Meahccebuollimiid geažil máŋggat ealličivggat leat báhcán oarbbisin. Seahkkaelliide, dego keŋguruide, gorrojuvvon seahkka buktá dorvvu dovddu.

– Mun gorron ovtta stuorra keŋgurupusse. Dat galggai leat guovttegeardásaš, ahte dat gierdá. Dasa galggai maiddái goarrut skoađđasa. Keŋguruhan eallá stuorimus oasi čivgaeallimis pusse siste, eatnis lahka, muitala Näkkäläjärvi.

Kengurut pakenivat paloa Cooman lähistöllä Australiassa 4. tammikuuta.
Keŋgurut ja eará eallit leat šaddan báhtarit meahccebuollimiid. Dolla lea jávistan viiddis guovlluid. Govva: Saeed Khan / AFP

“Soaittán goarrut vel lasi, jus orru dárbu ja asttu”

Ii leat vuosttaš geardi, go Näkkäläjärvi háliida bidjat návccaidis earáid buorrin. Diibmá son gođii Roavenjárgga riegádahttinossodahkii unna ullosuohkuid.

– Mun in ruhtan sáhte šaddat, muhto mus leat liigemateriálat, maidda mus ii leat atnu. Diein mun sáhtán ráhkadit, dat eai šat mávsse munnje maidege, dadjá Näkkäläjärvi.

Suodjeseahkažiid goarrun Austrália elliide lea buktán Näkkäläjärvii buori dovddu.

– Inhan mun bastte dálkkádatrievdamii maidege. Dat vahát lea juo dáhpáhuvvan ja doppe leat dat buollimat, inge mun sáhte dohko vuolgit veahkkin dáppe davvin. Vaikko eai leat go 20 pusseža, de gal dat lea goit juoga, smiehtada Näkkäläjärvi.

– Sávvamis diein lea suodji daidda oarbbes ealličivggaide, mat leat gáddjojuvvon dain meahccebuollimiin. Soaittán mun goarrut lasi vel, jus orru dárbu ja mus lea asttu ja dilli, mojohallá Näkkäläjärvi.

Varrasamosat

Muualla Yle.fi:ssä