Sápmi |

AVI bálgosa juohkináššis: "Hálddahusrievttis earálágan oaidnu das, geaid galgá gullat"

Lappi guovlohálddahusdoaimmahaga leanašibitdoavttir Risto M. Ruuska muitala, ahte sii áigot gullat maiddái bálgosa dál, go gieđahallet ášši ođđasit.

Läänineläinlääkäri Riso M. Ruuska
Lappi guovlohálddahusdoaimmahaga leanašibitdoavttir Risto M. Ruuska. Govva: YLE/Raimo Torikka

Davvi-Suoma hálddahusriekti lea mearridan gomihit Lappi guovlohálddahusdoaimmahat AVI mearrádusa leat juogekeahttá Neakkela bálgosa Eanodagas ja máhcaha ášši guovlohálddahusdoaimmahahkii ođđa gieđahallamii.

Hálddahusriekti oaivvilda mearrádusastis, ahte guovlohálddahusdoaimmahat ii leat gullan áššis doarvái bálgosa.

Juohkinášši gieđahallin joatká Lappi guovlohálddahusdoaimmahaga leanašibitdoavttir Risto M. Ruuska. Son muitala, ahte sii čuvvot hálddahusrievtti mearrádusa.

– Hálddahusrievttis lei earálágan oaidnu go mis das, geaid galgá gullat. Mii čuovvut dieđusge hálddahusrievtti mearrádusa, nappo gullat dasto bálgosa ja eará oassebeliid daid cealkámušain, main sii eai leat beassan cealkit vuosttas gieđahallamis, muitala Risto M. Ruuska.

Ášši gieđahallan álgá borgemánu 6. beaivve maŋŋil

Hálddahusrievtti mearrádus oažžu láhkafámu 30 beaivvi maŋŋá mearrádusa diehtunaddimis. Hálddahusrievtti mearrádusa lea vejolaš váidit borgemánu 6. beaivve rádjai. Dan maŋŋil guovlohálddahusdoaimmahat gieđahallagoahtá ášši.

– 30 beaivvi maŋŋil mii dárkkistit hálddahusrievttis, leatgo boahtán váidagat. Jos eai leat boahtán váidagat, dat mearrádus lea ožžon láhkafámu ja mii gieđahallagoahtit dan, Ruuska muitala.

Ruuska ii vuos kommentere ášši gieđahallama dađe dárkilabbot.

– Mis ii leat vel detálljadiehtu das, mo teknihkalaččat gullan dahkko. Juohke dáhpáhusas bálgosa čoahkkimii addojuvvo vejolašvuohta cealkit ja bálgosa lahtuid maid boahtit gullat oassebeallin. Dat lea teknihkalaš gažaldat, mo sii besset oahpásnuvvat dán materiálii, mii lea oalle olu, Ruuska dadjá.

Varrasamosat: Sápmi

Váldoođđasat

Varrasamosat

Muualla Yle.fi:ssä