Sápmi |

AVI: Neahkkela bálgosa eai juoge guovtti oassái – "Ii váttásmahte sámi boazodoalu"

Lappi guovlohálddahusdoaimmahat ii juoge Eanodaga Neahkkela bálgosa guovtti oassái, dego bálggus lea gáibidan. Guovlohálddahusdoaimmahaga mielde bálgosa guohtuneatnamat eai juohkásivčče vuoiggalaččat. Doaimmahat ii jáhke dán váikkuhit sámi boazodollui, vaikko sámediggi lea oaidnán ášši earáláhkai.

Näkkälän paliskunnan kokous
Neahkkela bálgosčoahkkin mearridii álggahit juohkit bálgosa guovvamánus 2012. Govva: Vesa Toppari / Yle

Lappi guovlohálddahusdoaimmahat AVI ii juoge Neahkkela bálgosa guovtti oassái, dego bálggus ieš lea gáibidan. Juohkimii leamaš sivvan davvi- ja máttaoasi riiddut guohtuneatnamiin.

Neahkkela bálgosčoahkkin mearridii juohkigoahtit bálgosa guovvamánus 2012. Mannan geassemánus 25.6.2014 mearridedje rájiid evttoheamis. Čoahkkin evttohii, ahte bálggus juhkkojuvvošii mátta- ja davábeale osiide.

Neahkkila bálggus doaimmahii 1.9.2014 Lappi guovlohálddahusdoaimmahahkii nannenláhkai mearrádusa bálgosa juohkima rájiin.

"Gažaldagas ii leat váidingelbbolaš ášši"

Lappi guovlohálddahusdoaimmahat almmuhii goit otne maŋŋebárgga, ahte ii nanne Neahkkela bálgosa mearrádusa guovtti ođđa bálgosa rájiin.

– Bálggus ii juhkkojuvvo, almmuha guovlohálddahusdoaimmahat.

Lappi guovlohálddahusdoaimmahat lea váldán rájiid nannema guoski ášši gieđahallamii fuolakeahttá das, ahte mearrádusas lea váidojuvvon Davvi-Suoma hálddahusriektái. AVI cealká mearrádusas, ahte gažaldagas ii leat váidingelbbolaš ášši, go váldá vuhtii boazodoallolága 6 § ja boazodoalloásahusa 6 § sihke ášši válmmaštallamii laktáseaddji Roavvenjárgga hálddahusrievtti mearrádusa 12.7.2012, mii lea ožžon lágafámu alimus hálddahusrievttis 30.12.2013.

Boazodoallolága 6 § 3 momeantta mielde bálgosiid doaibmaguovlluid rájiid nanne Lappi guolvohálddahusdoaimmahat.

"Juohku ii livčče vuoiggalaš - Ii váttasmahte sámi boazodoalu"

AVI cealká mearrádusastis, ahte bálgosa juogus šaddi ođđa bálgosiid guohtoneatnamat eai juohkás vuoiggalaččat ja ovttaveardásaččat boazologuid ektui.

– Máttabeali guohtuneatnamat livčče leamašan čielgasit fuonibut boazologu ektui go davábeali, AVI oaivvilda.

AVI joatká, ahte bálgosa juogekeahttá guođđin ii eastte dahje váttásmahte sámi boazodoalu. Sámediggi leamaš eará oaivilis áššis. Dat celkkii álgojagi, ahte bálgosa dahkan mearrádus dorvvastivččii sámiid rivttiid, mat leat dáhkkiduvvon vuođdolágas ja álbmogiidgaskasaš soahpamušain.

Varrasamosat: Sápmi

Váldoođđasat

Varrasamosat

Muualla Yle.fi:ssä