Sápmi |

Avvila bálgosa boazoisit sávvá AHR gieđahallat golleroggama váikkuhusaid boazodollui ja lundui viidát – Sámediggi lea duđavaš, go ožžo AHR báikki ala

Suoma Alimus hálddahusriekti galleda Palsinojas, mii lea dehálaš guovlu Avvila bálgosii.

Ari Kustula
Ari Kustula sávvá, ahte golleroggama váikkuhusaid lundui sihke boazodollui árvvoštalašedje viidát. Govva: Kirsti Länsman / Yle

Avvila bálgosa boazoisit Ari Kustula ja Suoma Sámedikki nubbi ságadoalli Leo Aikio leaba duđavaččat, go Suoma alimus hálddahusrievtti (AHR) ovddasteaddjit galledit dál Palsinojas, mii lea Avviljoga oalgejohka. AHR geahčada golleroggama váikkuhusaid guovllus.

Ari Kustula mielde guovlu lea dehálaš guottetbáiki ja geasseorohat bálgosii.

– Geassit mii massit dan guohtuneatnamin, go eallu ii bálle doppe leat. Juohke ádjagis leat golleroggit, lávejit leat oktiibuot máŋga čuođi.

Dasa lassin Kustula lohká, ahte golleroggiid ráhkadan buođut golget. Su mielde čáhči láve leat ain duollet dálle áibbaš ruškkadin.

Geahčadeapmi ii leat dikki njálmmálaš gieđahallan, muhto báikki geahčadeapmi geavahuvvo vuođđun ášši loahpalaš gieđahallamis. Boazoisit Ari Kustula sávvá, ahte AHR válddašii ollislaš gova vuhtii.

– Dat ii leat goassige dutkojuvvon, mo dat (golleroggan) váikkuha ollislaččat. Dan eai váldde vuhtii, baicca vudjot dušše ovtta golleroggenbáikki árvvoštallamii, moaitá Kustula.

– Dat galggašedje bidjat visot oktii, ja árvvoštallat dan ollisvuohtan.

"Min cealkámušain ii lean makkárge mearkkašupmi"

Álgoálggus lei Sámediggi, mii guoddalii Palsinoja mášengolleroggamii addojuvvon lobiin vuos Vaasa hálddahusriektái. Sámediggi ii duhtan Vaasa hálddahusrievtti mearrádussii iige ášši šat doppe ovdánan. Danin Sámediggi váiddiige áššis alimus hálddahusriektái jagis 2018.

Kustula mielde lea buorre, go Sámediggi fuolahii ášši gitta alimus hálddahusriektái, go bálgosis eai alddis livčče lean dasa návccat. Dalle go gollerogganlobis mearridedje, bálggus celkii áššis, muhto cealkámuš ii váldon mearrádusas vuhtii.

Bálggus ii váidán rogganlobis viidásappot resursaváni dihtii.

– Álggushan cealkamušbivdagat bohte ja mii celkkiimet áššis, muhto dat bohtet muđuige dán áigge jámma. Iihan bálgosis leat resurssa cealkit juohke áššis, ja dat áššit main celkkiimet, dain min cealkámušain ii lean makkárge mearkkašupmi.

Palsanoja
Golleroggan váikkuha eatnama lassin maiddái čázádahkii, muittuha Kustula. Govva: Kirsti Kustula

Ari Kustula jáhkká, ahte dán dáhpáhusas šaddá nu gohčoduvvon ovdadáhpáhus, mii váikkuha maiddái eará sullasaš áššiide.

Guldal Ari Kustula jearahallama dás. Jietna: Aslak Paltto / Yle

Geahčadeamis leat mielde earret eare Sámedikki ja bálgosa ovddasteaddjit

Alimus hálddahusrievtti beales Palsinoja geahčadeamis leat mielde presideanta Kari Kuusiniemi, vuoigatvuođaráđđeolbmot Kari Tornikoski, Tuomas Kuokkanen, Jaakko Autio ja Pekka Aalto, birasáššedovdiráđđeolbmot Jukka Horppila ja Seppo Rekolainen sihke vuoigatvuođačálli Päivi Korkeakoski.

Riekti lea bovden geahčadanbáikái Sámedikki ovddasteddjiid, biraslobi ohcci sihke sierra eiseválddiid ja bálgosa ovddasteddjiid.

Sámedikkis dán geahčadeapmái oassálastet nubbi várreságadoalli Leo Aikio, ealáhusčálli Sarita Kämäräinen, sadjásaš láhkačálli Kalle Varis ja sadjásaš birasčálli Tiina Lovisa Solbär.

Leo Aikio
Leo Aikio jáhkká, ahte AHR bastá dál árvvoštallat ášši buorebut, go leat fitnan báikki alde. Govva: Tuomas Hautaniemi / Yle

Leo Aikio lea duđavaš dasa, ahte leat ožžon AHR ovddasteddjiid báikki ala.

– Dat lea dehálaš, ahte viimmat bohtet ja oidnet, makkár váikkuhusat dat albmaláhkai leat ja makkár luottat golleroggamis báhcet min Sápmái.

Geahčadeapmi ordnejuvvo čakčamánu 8.–9. beaivve.

Guldal Leo Aikio jearahallama dás. Jietna: Aslak Paltto / Yle

Ášši birra leamaš sáhka vuossárgga Ásllaga Á-studios. Á-studio sáhttá guldalit Yle Areenas ja luđet maiddái podcastan. Ášši birra eambo vel otná Dearvva-sáddagis diibmu 14.30–16.00.

Varrasamosat: Sápmi

Váldoođđasat

Varrasamosat

Muualla Yle.fi:ssä