Sápmi |

Avvila dearvvašvuođaguovddážis joatkašuvvá gohcin birra jándora goit jagi 2024 lohpii – stuorra mearkkašupmi guhkes gaskkaid dihte

Jođiheaddji doavttir Outi Liisanantti illuda áššis ja lohká, ahte birra jándora gohcin lea dehálaš maid pasieantadorvvolašvuođa dihte.

Inarin kunnan johtava lääkäri Outi Liisanantti.
Anára gieldda jođiheaddji doavttir Outi Liisanantti muitala, ahte Avvilis leamaš earenoamáš buorre doavtterdilli ja Avvila dearvvašvuođaguovddáš lea bivnnuhis skuvlenbáiki. Govva: Vesa Toppari / Yle

Sosiála- ja dearvvašvuođaministeriija lea mieđihan Anára gildii gaskaboddosaš lobi dearvvašvuođafuolahusa gohcimii, mii doaibmá birra jándora. Lohpi lea fámus boahtte jagi álggus gitta jagi 2024 lohppii.

Gielda ozai vuos bistevaš lobi birra jándora doaibmi dearvvašvuođafuolahusa gohcimii. Ministeriija ii goittotge sáhttán mieđihit bistevaš lobi, dasgo Suomas leat válmmaštallamin sosiála- ja dearvvašvuođabálvalusaid ođastusa.

Dearvvašvuođaguovddáža gohcinvejolašvuohta lea dehálaš gielddas, gos leat guhkes gaskkat ja gos lea maid sullii 300 kilomehtera mátki lagamuš guovddášbuohccevissui Roavvenjárgii.

Jođiheaddji doavttir Outi Liisanantti illuda sakka, vaikko lohkáge, ahte sii máhte gal vuordit dákkár mearrádusa.

– Das lea áibba hirbmat stuorra mearkkašupmi min doaimma bajásdoallama ja ovddideami dáfus, Liisanantti muitala.

Dehálaš ášši maid pasieantadorvvolašvuođa dáfus

Avvilis fuolahit maid olles Lappi guovllu telefongohcimis, mas Lappi guovllu ássit ožžot telefonkonsultašuvnna doaktáris dalle, go sin iežaset báikegottis ii leat gohcin. Lappis muhtin gielddain dearvvašvuođaguovddážat mannet gitta ovdamearkka dihte diibmu 16 dahje diibmu 21.

– Jus minge dearvvašvuođaguovddáš manašii gitta diibmu 21, de ambulánsajohtolat lassánivččii hirbmasit, muitala Liisanantti.

Son čilge, ahte ovdamearkka dihte čuovvoleami ja doaktára konsultašuvnna dárbbašeaddji pasieanttaid galggašii sáddet sihkkarvuođa dihte ovddosguvlui, jus Avvilis ii livčče gohcin.

Ambulánsabargiin leat dárkilis bargoáigemearrádusat, nuba bargoáiggiid ordnen šattašii maid hástaleaddjin, jus gohcin váillošii. Ovdamearkka dihte Njuorggámis lea Roavvenjárgii sullii 500 kilomehtera ja dat mátki váldá álo ambulánssas olles beaivvi. Jus Avvilis ii livčče gohcin birra jándora, dákkár mátkkitge livčče dávjjit.

– Maiddái riskkat sturrot dalle, go leat guhkes sirdingaskkat. Jus mátkki alde dáhpáhuvvá juoidá ovdal doaktára vuosttaš árvalusa, leat dakkár dilit hástaleaddjit. Goittotge helikopterat eai leat olu ja álo girdindálkige ii leat buorre, de pasieantadorvvolašvuođa dihte dát lea maid dehálaš ášši, Liisanantti dadjá.

Bálvala gieldalaččaid, bargiid ja mátkkošteaddjiid

Dál mieđihuvvon lohpi lea jođiheaddji doavttir Outi Liisanantti mielde guhkkit, man dearvvašvuođaguovddáš lea ovdal ožžon. Son goittotge muitala, ahte sávaldahkan lei gohcinlohpi doaisttážii vai das ii livčče dákkár mearreáigi.

Dál goittotge čuovvovaš njeallje jahkái gohcin birra jándora lea sihkkarastojuvvon.

Dat, ahte Avvila dearvvašvuođaguovddážis lea álo gohcin, bálvala sihke gieldda ássiid ja mátkkošteaddjiid. Liisanantti muitala maiddái, ahte ovdamearkka dihte bargiid rekryterema oasil 24 diimmu gohcima mearkkašupmi lea stuoris.

– Mis lea leamaš earenoamáš buorre doavtterdilli, mii leat bivnnuhis skuvlenbáiki. Dáppe oažžu máŋggabealat skuvlejumi ja maid seaŋgaossodaga doaibma lea máŋggabealat ja ovdánan, čilge Liisanantti.

Varrasamosat: Sápmi

Váldoođđasat

Varrasamosat

Muualla Yle.fi:ssä