Kaikki talviolympialaisista!
Sápmi |

Avvila lahkosiidda govdaoallefierpmádagat – "Govdaoalli sáhttá juobe veahkehit nuoraid bissut davvin"

Avvila nuorttabeallái háliidit geassit govdaoali. Govdaoalli sáhttá ealáskahttit olles gili, oaivvilda Kuitua pohjoiseen -fidnu prošeaktajođiheaddji. Tolosii huksejuvvon govdaoallefierpmádat lea leamašan ávki gili olbmuide.

Jietna: Seppo Alatörmänen
Jietna
Kuitua pohjoiseen -fidnu jođiheaddji Seppo Alatörmänena mielde govdaoalli sáhttá veahkehit nuoraid bissut ruovttuguovllus.

Dál lea plánan hukset govdaoallefierpmádaga (su. valokuitu) Keväjávrri gilážii, Avvila nuorttabeallai. Daid plánaid duohken lea Kuitua Pohjoiseen -fidnu. Keväjávrri govdaoallefierpmádahkii eai leat vel ásahan konkrehta áigetávvala, muhto ášši ovdii leat goittotge bargamin.

Dat fidnu lea guovtti jagi diehtojuohkinfidnu, man ulbmilin lea dieđihit ja muitalit giliide, fitnodagaide ja gielddaide govdaoallefierpmádaga vejolašvuođain. Dan lassin fidnu ulbmilin lea maiddái lasihit boaittobeal giliid eallinfámu ja buoridit fitnodagaid doaibmavejolašvuođaid.

Govdaoalli sáhttá juobe veahkehit nuoraid bissut davvin, oaivvilda fidnu prošeaktajođiheaddji Seppo Alatörmänen.

– Sáhtašin masá čuoččuhit, ahte dat gilit dáppe davvin main lea dát fierpmádat, dat gilit leat hui aktiivvalaččat.

– Dat leat dát gilit gos lea ain eallin, gos leat nuorat go oktavuođat doibmet, gos loktet maiddái bargoahkásaš olbmot, ja gos maiddái vuorrasut olbmot sáhttet assat ruovttus guhkkit, go dat digitálabálvalusat dahket dan vejolažžan, čilge Alatörmänen.

Govdaoalis lea leamašan ávki - Bastá bargat maiddái ruovttus

Mannán geasi huksejedje govdaoallefierpmádaga maiddái davimus Supmii, Avvila Tolosa-gillái ja Áijihjávrái. Tolosa gilážii dan govdaoallefierpmádagas lea leamašan ávki, muitala Kirsti Kustula, guhte lea Tolosa gili govdaoalli ossodatgotti ságajođiheaddji.

– Leahan dat somá go dihtoris buot mildosat ráhpasit ja go dat oktavuođat eai boatko ollesáigge de sáhtan maiddái oassálastit čoahkkimiidda dan bokte.

Kirsti Kustula
Kirsti Kustula vuordá jiekŋaskearrospealuid álgima, go beassa geahččat daid jođánis fierpmi bokte. Govva: Yle

– De dieđusge soapmásiin mis leat televišuvnnas badjelmearálaš kanálat ja dál mun vuorddánge jiekŋaskearrospealuid álgima vai beasan daid geahččat, boagusta Kustula.

Áššis eambo sáhttá guldalit Yle Areenas.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä