Sápmi |

Avvilis ja Eanodagas vilges gahpirat juhkkojuvvojit unna dilálašvuođas, mii streamejuvvo ruovttuide

Nuorat ožžot vilges gahpireaset skuvllas álo unna joavkkuin hávil ja bearaš sáhttá geahččat dan streama bokte ruovttus.

Ulla Hynönen
Rektor Ulla Hynönen oaivvilda, ahte lea buot buoremus doallat dilálašvuođa dál dasgo lea váttis diehtit joatkašuvvágo koronadilli dákkárin vel borgemánus. Govva: Eljas Niskanen / Yle Säämi

Koronaepidemiija geažil leat ain fámus čoahkkananráddjehusat olles Suomas. Ráđđehus lea gieldán stuorra joavkkuid čoahkkanemiid, nuba logahagatge eai beasa doallat albma ávvudilálašvuođaid ođđa studeanttaide.

Logahagain leat máŋggalágán čovdosat studeantadoaluid ordnemii.

Ovdamearkka dihte Suoma logahatoahppiid searvi (Suomen Lukiolaisten Liitto) lea evttohan olles Suomas oktasaš válmmaštuvvanbeaivvi álgočakčii, borgemánnui. Studeantadoalut leat okta daid dehálamos beivviin nuorra olbmo eallimis, logahagaid árbevieruin ja bálkkašupmi áŋgiris studeremis ja nuorain galgá leat vejolašvuohta ávvudit dan, cealká lihtu.

Avvila logahagas leat goittotge mearridan, ahte buot buoremus čoavddus lea doallat dilálašvuođa dál, go boahttevuođa ii máhte giige einnostit. Nuba dilálašvuohta lea dalle, go dábálaččatge livčče, nappo 30.5.

– Dilli lea nu eahpesihkkar dál, ahte mii eat dieđe sáhttágo maŋŋelabbosge doallat álbmotdilálašvuođaid, lohká Avvila logahaga rektor Ulla Hynönen.

Avvilis dilálašvuohta streamejuvvo ruoktot bearrašiidda ja logahaga eará oahppiide. Dilálašvuođas vilges gahpira ožžot álo studeanttat unna joavkkuin. Bearrašat mearridit ieža, makkár doaluid sii ordnejit dasto ruovttus.

– Háliidit, ahte studeanttain lea dat dilálašvuohta. Dat ii boađe leat árbevirolaš, muhto doppe bohtet leat árbevirolaš elemeanttat, muitala Hynönen.

Streama Eanodagas, Ohcejogas doalut borgemánus

Eanodaga duottarlogahagas áigut maid sáddet njuolggostreama skuvllas 30.5., go nuorat ožžot vilges gahpira.

– Eará vejolašvuođat eai jur lean, muitala hálddahuslaš rektor Riitta Peltovuoma.

Ohcejoga čuvgehushoavda-rektor Eila Tapiola dadjá, ahte sii leat fas šaddan dakkár bohtosii, ahte studeantafeasta ordnejuvvo borgemánu loahpas, 28.8, juos dat lihkostuvvá koronadili dáfus.

Dárbbu mielde Ohcejoga doalut sirdašuvvet juovlamánnui, Suoma iehčanasvuođabeaivái, goas maid čavčča studeanttat dábálaččat ožžot vilges gahpira.

Varrasamosat: Sápmi

Váldoođđasat

Varrasamosat

Muualla Yle.fi:ssä