Sápmi |

Avvilis ja Gihttelis leat ráhkkanan sirdit dearvvašvuođaguovddážiid doaimmaid gaskaboddosaš lanjaide, jus šaddá vearrás dulvi

Avvilis ja Gihttelis dulvebáŋkkat suddjejit dearvvašvuođaguovddážiid. Maiddái evakuerenplánat leat dahkkon.

Jaakko Seppänen, sosiaali- ja terveysjohtaja, Inarin kunta
Anára gieldda sosiála- ja dearvvašvuođahoavda Jaakko Seppänen muitala, ahte gielddas leat dearvvašvuođaguovddáža evakuerensajit Suoločielggis. Govva: Anneli Lappalainen / Yle

Anára ja Gihttela gielddat leat ráhkkanan dasa, ahte giđa dulvvit sáhttet ollet gielddaid dearvvašvuođaguovddážiid rádjai.

Davimus Suomas lea dán dálvve leamašan earenomáš olu muohta, nuba einnostit maiddái garra dulvviid. Lappis alimus dulvvi einnostit leat oalle maŋŋit, nappo geassemánus.

Avvila gilis Anára gielddas leat juo lokten dulvebáŋkkaid 30 senttiin, muhto earálágan ráhkkaneapmi maiddái dárbbašuvvo. Avvilis čuvvot dulvedili ovttas teknihkkaossodagain. Sis lea maiddái plána vuorddekeahtes dáhpáhusaid várás.

– Mis leat muhtin molssaeavttut. Doaimma sirdin, ovdamearkka dihte dearvvašvuođaguovddáža evakueren, jus boahtá nu ollu čáhci, ahte dat eastá doaimma, muitala Anára gieldda sosiála- ja dearvvašvuođahoavda Jaakko Seppänen.

Ivalon terveyskeskuksen vuodeosaston ulko-ovi
Jus Avvila dearvvašvuođaguovddáža gártet evakueret, nu vuostáiváldin lea Avvilis ja Anáris ja váldodoaibma sirdojuvvo Suoločielgái. Govva: Anneli Lappalainen / Yle

Jus dilli gáibida evakuerema, dárkkuha dat dan, ahte oassi vuostáiváldimis livččii Avvilis ja Anáris, muhto dearvvašvuođaguovddáža váldodoaibma sirdojuvvošii Suoločielgái. Seppänen ii muital juste gosa Suoločielggis doaibma sirdojuvvošii. Anára gielda dieđiha áššis easkka de, jus dasa lea dárbu.

Seppänen muitala, ahte jus boahtá dárbu vuolgit, nu dárkkuhussan lea vuolgit ovdal, go čáhci lea ollen dearvvašvuođaguovddáža guvlui. Sidjiide bohtet dihto dieđut ovddalgihtii.

– Mis lea doarvái áigi vuolgit, oažžut doarvái fievrridankapasitehta ja ráhkkanit muhtinlágán nuppástusaide vuostáiváldinsajis, muitala Seppänen.

Gihttelis suddjejit dearvvašvuođaguovddáža ja bálvalanruovttu

Maiddái Gihttela gielddas leat huksen gaskaboddosaš dulvebáŋkka dearvvašvuođaguovddáža giddodaga guvlui. Dat seammás suddje guovllu geardedálu.

Dan lassin gielda leat ráhkkanan suddjet Pääskylänniemi bálvalanruovttu guovllu ja dahkan evakuerenplána, jus evakueremii lea dárbu. Dulvebáŋkkat, maid leat dál dahkan, leat alleleappos go ovdal. Maiddái sadji gávdno, jus vuolgga boahtá.

– Mis leat sadjásaš sajit. Mii leat dieđusge válmmaštallan dasa laktáseaddji evakuerenplána, muhto gal dat dárkkálmuvvá. Buot doaimmat dárkkálmuvvet, go mii váldit dulvvi ovddalgihtii vuhtii ráhkkaneami oasil, muitala Gihttela gielddajođiheaddji Antti Jämsén.

Gihttelis čuvvot dulveguovddáža ja Suoma birasguovddáža dieđuid dulvedilis. Jämsén ávžžuha maid priváhta giddodatoamasteddjiid čuovvut dulvedili ja ráhkkanit suddjet giddodagaideaset.

Antti Jämsén.
Gihttela gielddajođiheaddji Antti Jämsén lohká ahte gielddas lea dárbbašlaš máhttu dulvvi eastadeapmái. Govva: Antti Jämsén

Gielddain leat ovdalnai ráhkkanan dulvviide

Gihttela gielddajođiheaddji Antti Jämsén lohká, ahte guovllus lea nu olu muohta, ahte dán jagi dulvvi sáhttá buohtastahttit jagi 2005 dulvái. Dalle Gihttelis lei maŋimus stuorát dulvi. Das leat geahččalan oahppat ja ovddalgihtii árvvoštallat dili.

Jämsén muitala, ahte sii leat dál buoret ráhkkanan. Dearvvašvuođaguovddáža birrasii leat dahkan dulvebáŋkka, eará gieldda giddodagaid leat mannan čađa ja gieldalaččaid leat dieđihan dulvedilis. Sii maiddái barget ovttasbarggu eiseváldiiguin.

– Gielddas leat bures ráhkkanan maiddái ovdal. Dat ahte gielddas leat leamašan dulvvit, bargit leat hárjánan dáin áššiin ja lea dárbbašlaš máhttu dulvvi eastadeapmái, muitala Jämsén.

Maiddái Avvilis leat logiid jagiid leamašan plánat dan váras, jus garra dulvi boahtá. Plánaid leat álot beaivádan. Dán jagi lea goittotge earenomáš olu muohta, nu ahte dulvvi uhki lea stuorát go dábálaččat.

– Min dieđuid mielde dát dulvebáŋka lea dahkkon dulvvi várás, mii lea oktii 250 jagis. Einnostusaid mielde dulvi ii boađe dan badjel. Dan dáfus lean ráfálaš mielain ja gieldalaččat maid sáhttet leat ráfálaš mielain, dadjá Seppänen.

12.5.2020 dii. 07.43 Divvojuvvon: Jaakko Seppänen lea Anára gieldda Sosiála- ja dearvvašvuođahoavda iige sosiálahoavda, nugo árat muitaleimme.

Varrasamosat: Sápmi

Váldoođđasat

Varrasamosat

Muualla Yle.fi:ssä