Sápmi |

Avvila kiinnálaš turisttain ii leat koronavirus, čájánasaid bohtosat gárvánedje eahkes čieža áigge

Anára jođiheaddji doavttir Outi Liisanantti muitala, ahte lei jeđđehus sutnje gullat, ahte čájánasaid boađus lea negatiiva. Kiinnálaš turisttat besset dál joatkit iežaset luomu.

Varoituslappu Ivalon terveyskeskuksen ovessa.
Avvila dearvvasvuođaguovddáža uvssas čuoččui bearjadaga váruhus vejolaš koronavirusnjoammumis. Govva: Linda Tammela / Yle

Avvila guovtti kiinnálaš turisttas ii leat koronavirus.

Avvilis navde guovtti turisttas koronavirusa dan maŋŋá, go Wuhanis Supmii boahtán kiinnálaš áhčči ja gánda ohcaleigga Avvila dearvvasvuođaguovddážii dikšui duorastaga ja bearjadaga gaskasaš ija. Sudnos ledje influensádávdamearkkat. Soai ovttas bearraša etniin ledje bearjadatbeaivvi Avvila dearvvasvuođaguovddážis sirrejuvvon lanjas.

Kiinnálaččain váldojuvvojedje bearjadatiđit čájánasat. Daid sáddejedje dutkanláhkai Helssegii dearvvasvuođa- ja buresveadjinlágádus THL:ii. Čájánasaid bohtosat gárvvásmuvve bearjadateahkedis čieža maŋŋá. Boađus lei negatiiva.

Čájánasaid sáddejedje Helssegii, daningo daid galgá dutkat dorvolaboratoriijas, ja buot buohcceviesuin eai leat dakkárat.

Sáhtát geahččat Avvila dearvvasvuođaguovddážis bearjadaga diibmu 13.30 dollojuvvon dieđihandilálašvuođa dán artihkkalis. Doaimmaheaddjin doppe lei Yle Sámis Linda Tammela.

Anára jođiheaddji doavttir: Kiinnálaš turisttaguoktá beassaba jo otne eret dearvvasvuođaguovddážis

Anára gieldda jođiheaddji dearvvasvuođaguovddášdoavttir Outi Liisanantti muitala, ahte lei jeđđehus sutnje gullat, ahte čájánasaid boađus lea negatiiva.

Dál, go bohtosat leat čielgan, turisttat besset dearvvasmuvvat ráfis ja joatkit iežaset luomu.

– Mátkkálaččat besset jo otnáža áigge ruovttoluotta iežaset luopmobáikái, muitala Liisanantti.

Outi Liisanantti
Avvila dearvvasvuođaguovddáža jođiheaddji doavttir Outi Liisanantti muitala, ahte dearvvas olmmoš ii vealttakeahttá oppa fuomášge, ahte buohcá koronavirusa. Govva: Vesa Toppari / Yle

Báikkálaččat ja mátkkošteaddjit eai dárbbaš reageret dákkár diliide moge, deattuhii Liisanantti bearjadaga.

Vaikko koronavirus livččege gávdnon, eará olbmot eai dárbbaš herkkebut ohcalit dearvvašvuođadikšui.

Kiinnálaš bearaš lei johtán Davvi-Suomas moadde beaivve. Lappi guovddášbuohcceviesu infekšuvdnadoavttir Markku Broas dieđuid mielde sii ledje boahtán Wuhanis Supmii Norgga bokte.

Eiseválddit eai dárkilit muitalan, gos bearaš lea johtán, muhto earret eará Skábmagovat-festivála ja Anára hoteallat goit reagerejedje áššái.

Hengityssuojia ja käsidesi pöydällä Ivalon terveyskeskuksessa.
Avvila dearvvasvuođaguovddážis ávžžuhit olbmuid dárbbu miel desinfiseret gieđaid ja geavahit njálbmemáskka. Govva: Linda Tammela / Yle

"Ii gánnet heađástuvvat"

Maiddái infekšuvdnadoavttir Markku Broas deattuhii bearjadaga, ahte suopmelaččat eai dárbbaš heađástuvvat dákkár viruseahpádusain.

Son dajai jo bearjadatiđit, ahte jáhkkimis jearaldagas lea miinu eará dábálaš dávddaid. Dán dilis leat jođus sakka maiddái influensá ja dábálaš nurvot.

Markku Broas
Lappi guovddášbuohcceviesu infekšuvdnadoavttir Markku Broas oaivvilda, ahte áššis ii gánnet heađástuvvat. Govva: Sirpa Hanhivaara / Yle

– Wuhan gávpogis, gos virus lea vuolgán, ásset lagabui 10 miljon olbmo. Sihkkaraston njoammumat leamaš dušše moaddečuođi. Ii dat doppege mihkkige stuorra epidemiijaid leat.

"Suopma lea ráhkkanan bures"

Dearvvasvuođa- ja buresveadjinlágádus THL bajitdoavttir Taneli Puumalainen muitala, ahte Suopma lea ráhkkanan bures koronavirusa vejolaš leavvamii.

– Mii leat hárjehallan dearvvasvuođa áitagiid váras jeavddalaččat ja Suomas lea alladási dearvvasvuođadikšu.

Puumalainen dadjá, ahte jos gosnu guovllus Suomas gávdnet dávdda, de vuosttas lávki lea eastit dan njoammumis ovddosguvlui.

– Mii čielggadat buohcci oktavuođaid. Jos buohcci veadjá bures, sáhttá su dikšut ruovttus, muhto vearrát dilis buohcceviesus, Puumalainen čilge.

Hygieniaviranomaiset tutkivat Huananin ruokatoria.
Ođđa koronavirusepidemiija álggii Wuhanis. Govva Wuhan gávpoga Huanan borramuštoarggas, mii giddejuvvui ođđajagimánu 11. beaivve. Govva: Noel Celis / AFP

Ođđa koronavirusepidemiija álggii Wuhanis. Dávdii leat jápmán goittot 26 olbmo. Kiinnás dávda lea njommon badjel 800 olbmui.

Máilmmi dearvvasvuođaorganisašuvdna WHO ii goittot vuos leat meroštallan koronavirusa riikkaidgaskasaš áittan álbmotdearvvasvuhtii. WHO oaivvilda, ahte ášši galgá ain dutkat ja čuovvut.

Varrasamosat: Sápmi

Váldoođđasat

Varrasamosat

Muualla Yle.fi:ssä