Sápmi |

Ávvir almmuha luohtegilvvu, bija luođi Ávvirii

Ávvir deavdá dán jagi 10 jagi. Danin Ávvir bovde searvat gilvui bidjat luođi Ávvirii.

Kari Lisbeth Hermansen
Ávvira váldodoaimmaheaddji Kari Lisbeth Hermansen. Govva: Nils Johan Vars / Ávvir

– Luohti galggašii govvidit aviissa ja dan doaimma mii mis lea sámi servodagas, lohká Ávvira váldodoaimmaheaddji Kari Lisbet Hermansen.

Váldodoaimmaheaddji čilge, ahte luođi áigot geavahit aviissa doaluin, márkanfievrrideami oktavuođas ja eará oktavuođain, mat lunddolaččat gusket aviissa doibmii.

– Mii eat leat bidjan meriid makkár luđiin dahje dovnnain searvá, sáhttá leat árbevirolaš luohti dahje musihkkaluohti. Dan mearrida luohtedahkki ieš, lohká Hermansen vel.

Gilvvu njuolggadusat

Gilvu lea rabas ja almmolaš gilvu, ja luohti sáhttá leat árbevirolaš luohti dahje musihkkaluohti.

Luohti ii galgga leat ovdal almmuhuvvon, ja sus gii sádde luođi gilvui, fertejit alddis leat visot vuoigatvuođat almmuheami oktavuođas. Jus muhtin eará lea dahkan luođi, de ferte son maid miehtat dasa, ahte luohti sáddejuvvo gilvui. Jus luohti lea almmuhuvvon ovdal, dahje lea muhtin eará olbmo vuoigŋaduodji, dat ii leat Ávvira ovddasvástádus čilget daid áššiid.

Guokte jurylahttu addet čuoggáid luđiide, ja goalmmát jurylahttu lea álbmotjury. Dat, gii oažžu eanemus čuoggáid jurys, vuoitá.

Luođit almmuhuvvojit avvir.no-siiddus, gos šaddá álbmotjienasteapmi neahta bokte. Sisasáddejuvvon luđiid árvvoštallá Ávvir ja almmuha avvir.no-siiddus. Ávvir váldá mielde visot dohkálaš luđiid. Ávviris lea riekti leat válddekeahttá mielde luđiid, maid árvvoštallet ahte eai leat dohkálažžan dási dáfus, dahje heajos báddema geažil. Dási Ávvir árvvoštallá dan vuođul, ahte ii galgga leat tulljaluohti eaige galgga unohis dajahusat.

Vuoitoluohti almmuhuvvo ávvukonsearttas

Vuoitoluohti almmuhuvvo Ávvira 10-jagi ávvukonsearttas Guovdageainnus 24.8.18, ja vuoiti fidne bálkkašupmin 10 000 ruvnnu nappo badjelaš 1 000 euro.

Luođi sáhttá báddet mátketelefovnnain dahje studios. Jos dat ii lihkostuva, sáhttá váldit oktavuođa Ávvirii. Luođi sáhttá sáddet ovdamearkka dihte e-poasttain čujuhussii nilsjohan(a)avvir.no. Luđiid galgá sáddet 16.8.2018 diibmu 16 rádjái Norgga áiggis.

Eanet dieđuid oažžu neahttadoaimmaheaddji Berit Maria Lise Eiras čujuhusas lise(a)avvir.no dahje váldodoaimmaheaddji Kari Lisbeth Hermansenis čujuhusas kari(a)avvir.no.

Varrasamosat: Sápmi

Váldoođđasat

Varrasamosat

Muualla Yle.fi:ssä