Sápmi |

Ávvir: Báišduoddaris gávdnojit ain rievdaduvvon bohccot – Boles ii nanne dieđu

Bolesat leat ain bargamin Báišduoddara boazosuolavuođa ja vearistanrihkkosa ovdadutkamiin.

Paistunturin poroerotuspaikka
Báišduoddaris leat dál gárddástallamat jođus. Bálgosa bargun lea dutkat, gávdnojitgo eambo rievdaduvvon bohccot. Govva: Kaija Länsman / Yle

Báišduoddara bálgosis leat gárddástallamiid oktavuođas gávdnan eambo bohccuid, maid mearka lea rievdaduvvon, čállá Ávvir-áviisa. Dat laktásit seamma boazosuolavuhtii ja vearistanrihkkosii, man birra boles dieđihii mannán giđa.

Lappi bolesa rihkuskomissára ja dán dutkama jođiheaddji Mikko Halme ii nanne Yle Sápmái dan, ahte ođđa rievdaduvvon bohccot livčče gávdnon.

Mannán giđa dieđihedje, ahte leat gávdnan moaddelogi rievdaduvvon bohcco. Halme mielde dát diehtu doallá ain deaivása.

– In leat leamašan oktavuođas bálgosiin dál, go sis leat gárddástallamat jođus. Bálggus dutká ja árvvoštallá daid mearkkaid, boles ii leat doppe báikki alde dárkkisteamen mearkkaid, lohká Halme.

Halme muitala, ahte sii vejolaččat barget ovttas maiddái Norgga beale mearkalávdegottiin, jus šattaš dárbu.

Boles sávvá geargat dutkamiin boahtte giđa

Boles lea geargan juo muhtin veardde gullat navdojuvvon sivalaččaid, muhto ovdadutkan lea vel gaskan ja dárkkuhussan lea joatkit ságastallamiid áššái laktáseaddji olbmuiguin. Mikko Halme sávvá, ahte gearggašedje dutkamiin boahtte giđa.

– Oaidnit leš mo mii oažžut ášši ordnašuvvat. Jus almmuhit ođđa rievdaduvvon bohccuin, de fertet daid árvvoštallat, ahte mo dat váikkuhit dutkamii. Dan maŋŋá ášši manná áššáskuhttái, guhte oažžu mearridit mannágo ášši viidásabbot gearregiidda, čilge Halme.

Yle Sápmi ii fáhten Báišduoddara boazoisida ságaide.

Varrasamosat: Sápmi

Váldoođđasat

Varrasamosat

Muualla Yle.fi:ssä