Sápmi |

Ávvir: Fitnodatalmmái ii beasa hukset šalddi Anárjoga rastá

Kárásjoga gielddastivra lea hilgon Basevuovddi evttohuvvon ođđa guovlluplána.

Angeliin suunnitellun riippusillan piirustukset
Govva: Arkkitehtisuunnittelu Voutilainen Oy

Áŋŋela gilis Anárjoga rastá plánejuvvon šaldi lea garra vuostebiekkas. Kárášjoga gielddastivrra lea hilgon Basevuovddi evttohuvvon ođđa guovlluplána ja danin Basevuovddi eananeaiggát Stig Harby ii beasa cegget šalddi Anárjoga rastá, muitala Ávvir.

Áltálaš eananeaiggát ja fitnodatalmmái Stig Harby lea plánen jo guhkkit áigge huksehit šalddi Anárjoga rastá iežas eatnamiid gaskii, mat leat sihke Suoma ja Norgga bealde. Ášši lea jorran guhtta jagi Kárášjoga gieldda hálddahusas. Maŋimuš gielddastivrra čoahkkimis leige garra ságastallan dán áššis.

Gielddastivrra mearrádus oaivvilda dan, ahte Basevuovddi guovlu šaddá dál orrut nu go lea ja doppe ii oaččo rievdadit maidege. Kárášjoga gielddadirektevra Kurt Maurstad mielde mearrádus mearkkaša dan, ahte guovllus eai beasa hukset. Kárášjoga gielddastivra mearrádusas ii sáhte váidit.

Plánain láigobártagilli

Sveitsilaš-norgalaš fitnodatdoalli ja ruhtaalmmái Harby áigumuššan leamašan hukset heaŋgášalddi Anárjoga rastá, mii gierddašii tráktornjealljejuvllaga. Šalddi leat plánen cegget lahka Áŋŋela boares rádjegozihanlágádusa.

Stig Harby oamasta eatnama goappat bealde Anárjoga. Joga rastá mátki eatnamiid gaskka lea sullii 70 mehtera, muhto biillain geainnu mielde šaddá vuodjit sullii 130 kilomehtera, ovdalgo olle nuppe beallái. Harby plánain leamašan hukset báikái 12 láigobartta, guosseviesu ja vel eará viesuid.

Varrasamosat: Sápmi

Váldoođđasat

Varrasamosat

Muualla Yle.fi:ssä