Sápmi |

Ávvir: Norgga Sámedikki veahkkin bissehit Deanu bivdonjuolggadusaid

Sámi ealáhussearvi lea bivdán Norgga Sámedikki veahkkin bissehit ođđa Deanu bivdonjuolggadusaid. Deanu čázádaga vuoigatvuođaid oamasteaddjit ja ealáhussearvvit leat lágidan oktasaš vuostečállosa Norgga ja Suoma kommišuvnna bivdonjuolggadusa evttohussii. Odd Iver Solbakk Sámi ealáhussearvvis muitala Ávvirii, ahte ođđa njuolggadus ráddje garrasit guovllu bivddu.

Tenojoki
Govva: Sauli Antikainen / Yle

Sámi ealáhussearvi lea bivdán Norgga sámedikki veahkkin bissehit ođđa Deanu bivdonjuolggadusaid, muitala Ávvir-aviisa. Sámi ealáhussearvi deaivvadii mannan bearjadaga Norgga Sámedikki presideantta Aili Keskitaloin Unjárggas.

Aili Keskitalo
Aili Keskitalo Govva: Linda Tammela / Yle

Guovllu Deanu čázádaga vuoigatvuođalaid oamasteaddjit ja ealáhussearvvit leat lágidan oktasaš vuostečállosa Norgga ja Suoma kommišuvnna bivdonjuolggadusa evttohussii.

Vuostečállosis čuožžu, ahte Norgga ja Suoma kommišuvdna lea gárvvistan jo ođđa bivdonjuolggadusaid Deanu čázádaga riikkarájá oassái. Njuolggadusat bohtet fápmui geasset 2017.

Gáržžida guovllu bivddu

Sámi ealáhussearvvi Lemet-Jon Ivvár, Odd Iver Solbakk cealká, ahte jos njuolggadusárvalus boahtá fápmui, de dat gáržžida garrasit guovllu bivddu.

Odd Ivar Solbakk
Lemet-Jon Ivvár nappo Odd Iver Solbakk. Govva: MATHIS HÆTTA / NRK Sápmi

– Buođđumii ja golgadeapmái ii leat šat addon menddo viiddis bivdoáigi. Kommišuvdna lea sin evttohusas váldimin eret guovllu fierbmebivddus badjel 40 beaivvi boahtte jagi rájes. Dáid árbevirolaš bivdoneavvuid leat dážat ja láddelaččat áigá jo háliidan álfárot jávkadit, muitala Solbakk Ávvirii.

– Oaggus váldet fas fargga 25 beaivvi. Dan sadjái lea vierisbivdu meannuduvvon eanet árbmugasat. Stáhtanjuolggadus bidjan ja koartavuovdin olggobeale olbmuide leamaš dávjá guovllus ságastallanáššin, erenoamážit man viiddis dát váldi stáhtain duođas lea. Stáhta oaivvilda luossanálli lea heahtedilis Deanus, mii lea váldosivva dasa, ahte čavgejit bivdonjuolggadusaid Deanu čázádahkii. Dat ii doala deaivása, luosat leat doarvái čázádagas, oaivvilda Odd Iver Solbakk.

ILO konvenšuvdna, Finnmárkkuláhka iige ON máilmmijulggaštus leat váldon vuhtii

ILO konvenšuvdna, Finnmárkkuláhka iige ON máilmmijulggaštus leat váldon vuhtii, oaivvilda Solbakk.

– Norgga ja Suoma kommišuvnna árvalusas ii váldo Finnmárkkuláhka vuhtii, iige ILO konvenšuvdna, iige ON máilmmijulggaštusa olmmošvuoigatvuođaid birra, maid guktot riikkat leat ratifiseren, lohká Solbakk. Son lohká sii gáibidit, ahte kommišuvdna galgá ođđasit dahkat bivdonjuolggadusaid, dahje atnit doaibmi soahpamuša dassážii go dat dahkko, dadjá Solbakk.

Ášši loktejuvvo Norgga sámedikki dievasčoahkkimii čakčamánus

– Sámediggi doarju min ja váldet ášši duođas ja áigot loktet ášši dievasčoahkkimii dál čakčamánus, muitala Solbakk.

Silje Karine Muotka
Sámedikkeráđi lahttu Silje Muotka. Govva: Kenneth Hætta

– Maŋŋel go gulaskuddanáigemearri lea nohkan, de Sámediggi manná čađa buot gulaskuddancealkámušaid ja de hábme posišuvdnanotáhta, mas boahtá ovdan makkár oaidnu mis lea, ja ákkastallamat oaiviliidda. Mii loktet ášši dievasčoahkkimis ja de boahtá ášši Sámedikkeráđi duohkái, lohká Sámedikkeráđi lahttu Silje Muotka.

Muotka dadjá Ávvirii, ahte sii fertejit gulahallat Suoma stáhtain ja Suoma sámedikkiin dán ášši birra ja lohká áššiin lea hoahppu, go sii fertejit ollet buot dahkat ovdal čakčamánu dievasčoahkkima.

Varrasamosat: Sápmi

Váldoođđasat

Varrasamosat

Muualla Yle.fi:ssä