Säämi |

Baaleettánssám sojá muččâdávt meid anarâškielân

Puáhtá-uvsun baaleet tánssáđ sämikielân? Tääl tot lii máhđulâš, ko aanaarlâš Auri Ahola máttát párnáid baaleettánssám anarâškielân Anarist.

Auri Ahola
Auri Ahola čáittá, maht kalga. Govva: Jonne Järvinen / Yle Sápmi

Maaŋgâ uccâ nieidii já manebâ ij kandii-uv naver lii šoddâđ baaleettánssájeijen.

Tääl tot naver lii älkkeebeht meid sämipárnái uulâtmist, ko vuossâmuu tove baaleet, jazz já uđđâtaansâ puáhtá máttááttâllâđ anarâškieláin.

Ballerina Auri Ahola ciälkká ravvuid párnáid Aanaar škoovlâst. Sun lii máttááttâllâm anarâškielâ já haalijd máttááttiđ tánssám.

– Pyeri stelliilmâs, pyeri!, Ahola huikká tánssámsalist.

Juurdân lii hammiđ párnáid rijjâääigi puđâldâsâid jieijâs kielân

Suomâ aalmuglâšbaaleet ballerina já máttáátteijee Auri Ahola tuágádij, et sämipárnáid já -nuorâid iä lah puđâldâsah jieijâs kielân. Talle sun riemâi paargon.

– Tot lii hirmâd tehálâš, ete mist liččii meid puđâldâsah sämikielân ige tot liččii tuš škovlâkielâ teikkâ kielâpiervâlkielâ, et tast šodâččij taggaar jyehipiäiválâš argâkielâ meid puđâldâsâin. Já tiäđust-uv, ko tanssâ lii mijjân hirmâd tehálâš já mij oskop, ete tot lii párnáid já nuorâid hirmâd pyeri puđâldâs, te mondiet ij. Taat lii váhá ubâ proojeekt lamaš váhá taggaar jollâ proojekt, et mondiet ij tánssám sämikielân, Ahola povvâst.

Õhtteei Liikkõs, Ovtâstittee Lihâstâs

Tánssámproojeekt nommâ lii Õhtteei Liikkõs, ađai Ovtâstittee Lihâstâs. Ulmen lii uápistiđ párnáid já nuorâid maaŋgâmuđusijd tánssámvuovijd já meid eres puđâldussáid. Ahola uáiná tanssâkuursâst eenâb máhđulâšvuođâid, ko háástuid.

– Tasthân láá ennuv máhđulâšvuođah sehe párnáid, ete munjin. Mun meid uážum ennuv tiäđu tast, ete taggaar tääpi lii pyeri uážžuđ párnáid lihâdiđ já tánssáđ, sun iätá.

Auri Ahola
Govva: Jonne Järvinen / Yle
Algâaalgâst ruávinjargâlâš Ahola lii juksâm oovtâ nieidâi niävdusáámmât, sun peesâi ballerinan. Tom maŋa sun lii oppâm anarâškielâ, ja haalijd meid taam tááiđu jyehiđ iärrâsijd-uv. Ja kiiba tiätá, et maid sun val utká. Ballerina pargoost sun iätá, et tot lii eres-uv ko tuše mučis jurâdem.

– Tot lii hirmâd mučis áámmât já hirmâd suotâs áámmât, mutâ tot lii nuuvt korrâ hommá kal, ete ulmuuh iä oskokin, mon korrâ pargo tot lii leđe ballerina.

Keejâ lase taan fáádást onnáin Yle Uđđâsijn Yle tv1:st tijme 15.15!

Varrasamosat: Säämi

Váldoođđasat

Varrasamosat

Muualla Yle.fi:ssä