Sápmi |

Badjel 10 proseantta sámediggeválgga jienain eai váldon vuhtii – "Hui fuolastuhtti"

Measta 300 jiena eai sáhttán váldit vuhtii, go mildosat váilo.

Janne Näkkäläjärvi.
Sámedikki válgalávdegotti ságadoalli Janne Näkkäläjärvi mielas lea fuolastuhtti, go ledje nu olu jienat, maid ii sáhtán váldit vuhtii jienaid lohkamis. Govva: Kaija Länsman / Yle

Válgalávdegoddi fidnii sámediggeválggas oktiibuot 2853 jiena, main dat ii sáhttán váldit vuhtii 290 stuhka.

Vuhtiiválddekeahttá báhce nappo 10,2 proseantta olles jietnamearis. Jienaid eai sáhttán váldit vuhtii danin, go jienastanbáhpáriin váilo mildosat.

Dát lea fuolastuhtti sámedikki válgalávdegotti ságadoalli Janne Näkkäläjärvi mielas.

– Dáid válggain ledje olu jienat, maid eat sáhttán váldit vuhtii jienaid lohkamis. Stuorámus oasis dáid jienain váillui vuolláičállojuvvon sáddenreivve ja danin daid ii sáhttán váldit vuhtii, čilge Näkkäläjärvi.

Go jienasta sámediggeválggain, de galgá máhttit doaibmat riekta konfaluhtaiguin. Válgalihpo galgá bidjat sierra válgakonfaluhttii. Dasto galgá vuolláičállit sáddenreivve, sihke válgakonfaluhtta ja sáddenreivve galget biddjot seamma máhcahankonfaluhttii.

Sáddenreivve lea dehálaš.

– Dan ulbmil lea eastit olbmo jienasteamis guktii, čilge Näkkäläjärvi.

Dát ii leat vuosttas geardi, go ná olu jienat báhce dohkkekeahttá.

– Go mun geahčan statistihkaid, de ovdamearkka dihte 2003 válggain ledje measta seamma veardde hilgojuvvon jienat, go váilo dat konfaluhtat.

Jagi 2015 válggain 12 jiena eai dohkkehuvvon.

Suomas lea oktiibuot 5873 sápmelaččas jienastanriekti. Sámediggeválggaid jienastanproseanta lea dálá rehkegiid mielde 48,58.

Sámediggeválgga buot bohtosiid sáhttá geahččat Yle Sámi válgaboađusbálvalusas.

Beaiváduvvon 1.10.2019 diibmu 13:48: Lasihuvvon diehtu jagi 2015 válggaid jienain.

Divvojuvvon 1.10.2019 diibmu 15:44: "Hilgut"-sáni sadjái molsojuvvon "vuhtiiváldit".

Varrasamosat: Sápmi

Váldoođđasat

Varrasamosat

Muualla Yle.fi:ssä