Sápmi |

Badjel 200 nuora čoahkkanit Helssegii háleštit dálkkádaga ja birrasa birra – mielde čoahkkimis leat maiddái sámepolitihkkarat

Nuoraid bálvalan- ja váikkuheaddjiorgána Allianssi lea ovttas nuoraiguin ordnen dálkkádatčoahkkima.

Saamelaiskäräjien nuorisoneuvoston puheenjohtaja Anni-Sofia Niittyvuopio.
Anni-Sofia Niittyvuopio vuordá buriid ságastallamiid dálkkádatáššiid birra, maid oktavuođas sáhttá loktet eamiálbmotoainnu ovdan. Govva: Vesa Toppari / Yle

Sámedikki nuoraidráđi ságadoalli Anni-Sofia Niittyvuopio oassálastá nuoraid dálkkádat- ja birasráđđádallamiidda lávvardaga. Guldal olles jearahallama dás. Jietna: Xia Torikka / Yle

Dán vahkkoloahpa čoahkkanit badjelaš 200 nuora Helssegii ságastallat dálkkádaga ja birrasa guoski áššiin. Dán čavčča olles máilbmi lea ráhkkaneamen Ovttastuvvan našuvnnaid biodiversitehta- ja dálkkádatráđđádallamiidda, ja danin leatge háliidan čohkket nuoraid miehtá Suoma ságastallat dain áššiin.

Nuoraid dálkkádatčoahkkimis áššedovdit ja nuorat guorahallet hástalusaid, mat laktásit luonddu duššamii ja dálkkádatkriisii.

Nuoraid jurdagiid lea guldaleamin birasministtar Krista Mikkonen, ja daid dolvot ovddosguvlui Eurohpá uniovnna boahttevuođakonferánsii ja Ovttastuvvan našuvnnaide.

Niittyvuopio sávvá eamiálbmogiid jiena gullot viidát

Sámedikki nuoraidráđi ságadoalli Ánne-Sofe Niittyvuopio lea iluin vuolgimen čoahkkimii, dasgo dan leat nuorat ieža plánen, ordnen ja buvttadan. Niittyvuopio mielde ordnejeaddjinuorat leat dovdan, ahte eamiálbmogiid jietna ii leat leamašan doarvái oidnosis dálkkádatságastallama olis.

Son maid sávvá, ahte dán dáhpáhusa bokte sii ožžot jienaset gullosii viidásabbot dohko, gos mearridit dain áššiin.

– Nuorat ságastallet ovttas ja loktejit ovdan áššiid, maid oaidnit dehálažžan. Dat áššit dolvojuvvojit ovddosguvlui birasministarii, gii dasto sávvamis doalvu daid ovddosguvlui nu Suoma politihkas go maiddái Ovttastuvvan našuvnnaid dásis, lohká Niittyvuopio.

Sámi ovddasteaddjit leat mielde ságastallamiin

Niittyvuopio lea mielde COP26-panelas muitaleamen sámenuoraid cealkámušas dálkkádatdoaimmaid ektui ja son lágida maiddái ságastallama, mas gieđahallat suopmelaš gaskavuođa lundui.

Su lassin dáhpáhusas lea mielde áššedovdiságastallamis Sámedikki ságadoalli Tuomas Aslak Juuso. Juuso buktá iežas oainnuid ovdan das, mo sápmelaččaid jietna gullo dálkkádatáššiid oktavuođas. Maiddái Sámiráđi várreságadoalli Áslat Holmberg hállá dáhpáhusas das, ahte geat leat mielde dálkkádatságastallamis ja mo sii leat das mielde.

– Mun jáhkán, ahte mis leat hui buorit ságastallamat ja mii maiddái loktet eamiálbmogiid rivttiid, illuda Anni-Sofia Niittyvuopio.

Čoahkkin ordnejuvvo lávvardaga 23. beaivve ja dat streamejuvvo diibmu 14.00 ovddosguvlui. Njuolggostreama sáhttá čuovvut Allianssi Youtube-kanála bokte.

Beaivvi ságaid ja Yle Ođđasiid Sámis sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä