Sápmi |

Badjel bealli Lappi eanangotti fitnodagain ballá gártat heaittihit dahje geahpedit doaimma koronakriisa maŋŋá

Ballun lea, ahte stuorra oassi fitnodagain ja bargosajiin nohká, muitala Lapin yrittäjät -searvi.

Lapin Yrittäjien toimitusjohtaja Pirkka Salo
Lapin yrittäjät -searvvi beaivválašjođiheaddji Pirkka Salo. Govva: Arttu Salo

Guhtta fitnodaga logis jáhkket iežaset gártat heaitit dahje aŋkke geahpedit doaimmaset koronakriisa maŋŋá Lappi eanangottis.

Lapin yrittäjät -searvi lea ollašuhttán juo guokte čielggadeami fitnodagaid dilis njukčamánu koronakriisa álgima rájes.

Vihtta proseantta fitnodagain jáhkká maid, ahte fitnodatdoaibma lea nohkan ollásit kriisa maŋŋá.

– Ballun lea, ahte šaddá vel vearrát dilli go 1990-logu ruđahis áiggiin, dadjá Lapin yrittäjät -searvvi beaivválašjođiheaddji Pirkka Salo.

Lappi eanangottis heaittihanáitta guoská aŋkke 500 fitnodaga ja olles Suomas 15 000 fitnodaga.

Searvvi mielas stáhta galggašii fállat doarjaga njuolgga fitnodagaide eará ovddidandoaimmaid ja loanaid lassin.

Lapin yrittäjät -searvvi čielggadeapmái oassálaste badjel 600 smávit fitnodaga Lappi eanangottis. Gažadeapmi dahkkui 14.–15.4.2020.

Fitnodagat ohcan doarjagiid juo dál stáhtas

Fitnodatdoalliid váttisvuođat oidnojit dainna, ahte stuorra oassi fitnodatdoalliin lea ohcan doarjagiid vai birgešedje fitnodatdoaimmaid geahppáneami dihte.

Gažadeami mielde davvin juohke njealját fitnodat leat ohcan dahje áigu ohcat Business Finland dahje EBI-guovddážiid ovddidandoarjagiid.

Ovtta olbmo fitnodagain 60 proseanttas fitnodatdoallit áigot ohcat doarjagiid, ja measta juohke goalmmát áigu almmuhit iežas bargguheapmin ja ohcat bargguhisolbmuide dárkkuhuvvon doarjagiid.

Muhtimat geahččalit gávdnat eará dietnasiid sadjái

Suomas máŋggat bivttassuorggi fitnodagat, nu unnit go stuorátge, leat álgán buvttadit ovdamearkka dihte iežaset veršuvnnaid gákkesmáskkas.

Maid ohcejohkalaš fitnodatdoalli Tiina Salonen goarrugođii máskkaid, go iežas suorggi barggut nohke koronavirusepidemiija dagahan dili dihte ja galggai hutkat ođđalágán doaimmaid.

– Mis lea turismma bealli jaskkodan, go ii sáhte váldit gussiid vuostá, de fertejin hutkat juoidá eará ja juoidá, maid sáhttá vuovdit, muitala Salonen.

Loga dáppe eanet, makkár doaimma Tiina Salonen hutkkai, go turismasuorggi barggut nohke njukčamánus.

Varrasamosat: Sápmi

Váldoođđasat

Varrasamosat

Muualla Yle.fi:ssä