Sápmi |

Badjeolbmo suohpangiehta lei buoremus Ijahis ija suohpansprinttas

Anára Ijahis Idja -festivála dovdojuvvo buorebut namalassii musihkkafestiválan, muhto dán jagi vuosttas geardde lágiduvvojedje maid sámi valáštallangilvvut. Ja giiba lea njoarosteamis čeahpit go badjeolmmoš.

Video: Niko Näkkäläjärvi
Video: Geahča dás min čavčča vuosttas tv-ášši! Govas dievdduid suohpansprintta ja njoarostangilvvu vuoiti Niko Näkkäläjärvi Eanodagas.

Badjeolbmo njoarostanmáhtu dihttui suohpansprinttas, vaikke buohkat eai gillenge nu duođas viehkat. 

Dievdduid suohpansprintta vuoiti Niko Näkkäläjärvi ii dárbbašan hárjehallat gilvonjoarosteami.

Niko Näkkäläjärvi
Niko Näkkäläjärvi vuitii suohpansprintta álbmaidluoká Anára Ijahis Ijas 2016 Govva: Anneli Lappalainen / Yle
– In leat gal daidda gilvvuide hárjehallan. Lean gal geahččalan, mo dát galgá. Vehá earálágan dát stoalpu leat njoarostit go boazu. Boazobargguinhan gálgá njoarostallat ain duollet dállet. Geassit njoarostallat misiid gitta, Näkkäläjärvi dadjá.

Badjeolbmuid mánát leat hárjánan njoarostallit 

Badjenieiddaguovttos Nuppu-Maaria ja Elle-Matilda Näkkäläjärvi eaba gal ballan njoarosteamis ja liikuiga viehkatge.

Mánáguoktái lei gilvohallan somás vásáhus.

– Ahte go mun ožžon dán njoarosteamis ovtta čoarvvi ja dat ahte oaččui viehkat, Elle-Matilda muitala.

Elle-Matilda ja Nuppu-Maaria Näkkäläjärvi
Mánáidluohká vuoitit Elle-Matilda ja Nuppu-Maaria Näkkäläjärvi Anára Ijahis Ijas 2016 Govva: Anneli Lappalainen / Yle
Nuppu-Maaria fas diđii gal dalánaga mii dán gilvvus lei erenomáš.

– No, dát njoarosteamit. Ja oaččui viehkat ja fertii mohkohallat.

Lunddolaš viiddidit valáštallamii

Ijahis ija váldolágiddeaddji lea valáštallansearvi Anára Sámisearvi. Danin leige lunddolaš viiddidit Ijahis ija valáštallama guvlui.

Suohpansprinttat mánáide, nuoraide ja ollesolbmuide bearjadaga sihke njoarostangilvu nissonolbmuide ja dievdduide lávvardaga geasuhedje logiid oassálastiid.

Aslak Paltto, Ijahis idja 2016
Govva: Anneli Lappalainen / Yle
Anára Sámisearvvi ságadoalli Aslak Paltto háliida čalmmustahttit njoarostallama ja miiba buoremus dasa go dakkár dáhpáhus, gosa olbmot čoahkkanit.

– Nu ahte čalmmustahttit, loktet fas bajás dán valáštallama, man suohtas dat lea. Ii dat dárbbaš leat nu duođalaš, muhto galhan dat eske lei duođalaš...huh, Paltto mojohallá.

– Gal suohpangiehta birge juohke hommás. Gánneha hárjehallat suohpaniin njoarostit, ávžžuha Paltto.

Boahtte jagi fas

Lágideaddjit ledje duđavaččat valáštallangilvvuide ja dat leat prográmmas maid boahtte jagi, dadjá festiválabuvttadeaddji Oula Guttorm.

Oula Guttorm, Ijahis idja
Govva: Vesa Toppari / Yle
Festivála dáiddalaš jođiheaddji oaidná sámi valáštallangilvvuin viidásotgo mearkkašumi sámi kultuvrii.

– Sohkabuolvvat leat ovttas dán min festiválas. Dán jagi prográmmii lasihuvvon valáštallangilvvut čatne sámi ealáhusaid mielde festiválii. Ealáhusat leat goittotge dat, mat dollet min kultuvrra eallin, dadjá dáiddalaš jođiheaddji Anna Näkkäläjärvi-Länsman.

Geahča Facebook-video Ijahis ija njoarostanstiillain dáppe!

Tv-ášši beassá oaidnit maid Ođđasat-sáddagis Yle Fem -kanálas vuossárgga 22.8.2016 dbm 20.45!

Varrasamosat: Sápmi

Váldoođđasat

Varrasamosat

Muualla Yle.fi:ssä