Sápmi |

Báikkálaččat vurdet vuoiggalašvuođa Deanu njuolggadusráđđádallamiin – luossabivdi: Doaivumis barget dakkár mearrádusaid, ahte luossanálli seailu

Ráđđádallangoddi lea čoahkkanan vuosttas háve geassemánus. Báikkálaččat vurdet, ahte dán háve sin jietna gullošii mearrádusdahkamis.

Niila Laiti lea Gálddoaivvi bálgosa várreboazoisit.
Ohcejohkalaš Niila Laiti sávvá, ahte Deanu njuolggadusráđđádallamiin váldojuvvošedje vuhtii namalassii eanaeaiggádiid vuoigatvuođat. Govva: Vesa Toppari / Yle

Deanu guolástannjuolggadusaid leat ođasmahttimin ja loahppagiđa stáhtaráđđi nammadii Suoma ráđđádallangotti. Dan ráđđádallangottis leat maid báikkálaš ovddasteaddjit.

Okta, guhte ovddasta báikkálaččaid, lea ohcejohkalaš Mika Aikio. Son vuordá, ahte ráđđádallamiin divvot vearrámus boastuvuođaid.

– Mun gal vuorddán olu dan, ahte ráđđádallamat livčče vuoiggalaččat ja váldojuvvošedje eanet ah eanet vuhtii sápmelaččaid vuoigatvuođat, bivdokultuvra ja sámegiela gádjun.

Ohcejoga girkosiidda guolástusgotti ságadoalli Mika Aikio
Ráđđádallangotti báikkálaš lahttu Mika Aikio vuordá, ahte ráđđádallamiin divvot vearrámus boastuvuođaid. Govva: Vesa Toppari / Yle

Aikio mielas dálá soahpamuš ii leat vuoiggalaš. Dat gulul suoská daid báikkálaččaid vuoigatvuođaid ja dasa gullevaš bivdovuogi ja giela, čuoččuha Aikio.

Su mielas mange bivdovuogi ii sáhte ráddjet šat eambbo.

– Dathan lea jo masá 80 proseantta ráddjejuvvon bivdoáiggis. Dakkár guolástusvugiid, mat vuođđuduvvet guolástanvuoigatvuhtii, ii goittotge oaččo eanet rádjet.

Vuosttas čoahkkin ráđđádallangottis leamaš geassemánu beallemuttus.

– Ieš dan barggus ii leat vel bessojuvvon mange muddui, muitala Aikio.

Fitnodatdoalliid ovddasteaddji sávvá dakkár njuolggadusaid, maid livčče álki áddet

– Dohko ministeriija guvlui mun in dieđe vel nu olu, muhto iigoson datge boađe čielgasin farggabáliid, smiehtada Valle.

Su mielas njuolggadusaid galggašii bargat dakkárin, ahte daid livčče álki áddet. Valle lea iežas fitnodatdoaimmas vásihan olbmuid suhtu váttes njuolggadusaid geažil.

– Misge okta olbmo bargu restoráŋŋas manná dasa, ahte čilget daid njuolggadusaid olbmuide ja guldalit daid, man bahámielas olbmot leat daid lobiid oastima birra. Dat doalvu dušši áiggi, dadjá Valle.

Petteri Valle
Fitnodatdoalli Petteri Valle lea iežas fitnodatdoaimmas vásihan olbmuid suhtu váttes Deanu guolástusnjuolggadusaid geažil. Govva: Kirsti Länsman / Yle

Luossabivdi: Doaivumis máhttet bargat dakkár mearrádusaid, ahte luossanálli seailu

Báikkálaš luossabivdi Niila Laiti Ohcejogas vuordá, ahte dán háve ráđđádallamat mannet buorebut go ovddit háve.

– Ovddit hávehan dat lei áibba dohkketmeahttun dat, ahte mo báikegotti olbmuid ja sin oainnuid badjel vázze.

Laiti sávvá, ahte njuolggadusráđđádallamiin váldojuvvošedje vuhtii namalassii eanaeaiggádiid vuoigatvuođat. Son lea vásihan, ahte báikegoddelažžan lea váttis oastit guolástanlobiid, mat bohtet árbeeatnamiid oamasteamis.

– Mun lean geahččalan fidnet, muhto go mun lean báikegoddeolmmoš, de munnje báhcá dan maŋŋá go vuos earát leat oastán daid lobiid. Mu buohta lea unna áššis gažaldat ja dušše okta dahje guokte jándoris, muhto dat vuođđojurdda lea endorii, oaivvilda Laiti.

Laiti lea fuolas Deanu luossanáli boahtteáiggis. Son vuordá, ahte ráđđádallangoddi váldá vuhtii luossanáli dálá dili.

– Doaivumis dat máhttet bargat dakkár mearrádusaid, ahte luossanálli seailu velá iige šatta menddo gilvu das, ahte gii oažžu dan maŋimuš luosa goddit.

Varrasamosat: Sápmi

Váldoođđasat

Varrasamosat

Muualla Yle.fi:ssä